Пронајдени исчезнатите близнаци од Прилеп

Прилепската полиција завчера изутрина ги пронајде близнаците на возраст од 16 години што претходната вечер биле пријавени за исчезнати. Децата се најдени здрави и живи, во близина на местото на кое исчезнале, без никакви повреди.

Двете момчиња со извесна психичка ретардација се изгубиле во околината на манастирот „Свети Димитрија“, во атарот на селото Селце, додека во петокот биле на екскурзија со своите врсници од средното училиште „Орде Чопела“ во Прилеп. Откако таткото на децата го пријавил нивното исчезнување, екипи на полицијата, наставниците и децата интензивно ги барале близнаците се' до раните утрински часови во саботата, кога биле пронајдени во близина на манастирот.

Според кажувањето на мајката Валентина Димеска, момчињата им се јавиле на родителите и побарале да ги земат. „Се јавија по телефон, рекоа дека повеќе не сакаат да останат на екскурзија, дека сакаат да ги земеме и ние отидовме да ги земеме. Тие додека си играле со другите деца се качиле на некои карпи за ��а се лизгаат, но не можеле да се симнат од карпите. Тоа се случи. Јас немам забелешка кон никого, никој не е виновен, ни наставниците ни директорката, никој. Сите беа вклучени во истрагата, сите ги бараа децата и се' добро се заврши, што е најважно“, вели мајката.

Двете момчиња, според битолската полицијата, биле најдени дури утрото, исплашени, но во добра здравствена состојба. „Доколку се утврди нечија вина, ќе се поднесе соодветна пријава“, вели Иво Котески, портпаролот на МВР.

Полицијата во истрагата ќе треба да одлучи како дошло до исчезнување на децата, дали до моментот на нивно условно предавање на нивниот татко, отсуствувала доволна грижа на наставниците што биле задолжени децата да ги носат на екскурзија. Директорката на училиштето, Славица Петроска, изминативе два дена не беше достапна за медиумите. Таа не одговара на телефонските повици. (Мн.Т.)