Камен-темелник на камбанаријата на „Св. Петка“

Кавадарци - Една година по стартот на изградбата на новата црква во Кавадарци, посветена на св. Петка, вчера беше осветен камен-темелникот на камбанаријата.

„Направените дела сведочат дека сме биле и дека сме постоеле. Каква историја и какво духодно наследство ќе имавме ако ги немавме градбите од нашите тетковци и дедовци“, истакна поглаварот на МПЦ, г.г Стефан.

Градоначалникот на Кавадарци, Александар Панов, им се заблагодари на сите донатори што го помагаат градењето на новиот храм и потенцира дека за кратко време Кавадарци ќе добие нов духовен, но и културен храм.

Најголем инвеститор на овој црковен објект е „Фени индустри“. Директорот Никола Ризов рече дека е задоволен од сработеното досега. „Нашата нова црква полека почнува да го добива својот финален лик, а тоа беше и целта на ’Фени индустри‘, да им подари трајно богатство на кавадарчани, но и на сите христијани, храм каде што ќе можат да го најдат духовниот мир, да побараат божји благослов и духовно водство, се' со цел да станеме подобри луѓе“, рече Ризов.

Митрополитот на Повардарската епархија, г. Агатангел, му предложи на градоначалникот, а во наредните денови ќе било доставено барање и до советот на Општината, црковното празнување на св. Петка да биде празник на градот.

Новата црква е лоцирана во новиот центар на Кавадарци, во близина на хотелот „Фени“. На оваа локација требаше да се гради црква од поодамна, но поради огромните димензии на така проектираниот објект, изградбата никогаш не започна. (А.Д.)