Нема веќе на лекар попладне?

Јасмина Јовановска

На лекарите на клиниките времено им се забранува да работат дополнителна дејност. На лекарите во неколку интерни клиники им било соопштено дека повеќе не смеат да прегледуваат пациенти во попладневните часови.

Директорите на неколку интерни клиники велат дека во отсуство на информации како да постапат во овој вакуум период додека не ги добијат новите дозволи, решиле времено да не работат дополнителна дејност. Ваквата забрана засега се применува на Клиниката за гастроентерохепатологија и на Клиниката за пуломологија, како и на другите клиники.

Раководствата на клиниките негираат дека овие одлуки се заради одредени укажувања од Министерството за здравство. А многу е нејасно како повекето клиники во ист периодс донеле времена забрана.

На временото стопирање на дополнителната работа реагираат лекарите. Тие велат дека ваквата одлука е неправилна. „Не може да се суспендираат дозволите за дополнителна дејност на лекарите на одредено време. Тие не се виновни што правилниците не се донесени навреме или што во Министерството за здравство не се ажурни “, вели еден лекар. На пример на Клиниката за пулмологија, правилникот е даден уште почетокот на јули, а се' уште немаат издадено нова дозовола за прекувремена работа. Лекарите прашуваат како може да се носи одлука без преоден период. „Што ќе се прави со закажаните прегледи на пациентите, никој не објаснува“, прашува еден лекар.

„Никој од Министерството за здравство не ни даде упатство како да постапиме за дополнителната дејност додека не се добие новото решение. Беа избори, па се избираше нов министер. Ги консултирав правниците и се договоривме дека е најдобро да не се работи дополнителна дејност додека не се добие новата дозвола“, вели д-р Ненад Јоксимовиќ директор на Клиниката за гастроентерохепатологиоја, затоа што клиника донела сопствена одлука за дополнителната дејност. Тој негира дека нивната одлука има врска со информациите во јавноста дека лекарите работат незаконски се' додека не добие клиниката ново решение за дополнителна дејност, ниту пак дека некој од Министерството за здравство така им сугерирал.

Јоксимовиќ вели дека иако новите законски измени се донесени лани, дури во март годинава биле известени дека треба да ги изготват новите норми за дополнителна работа.

„Тоа е долг процес, и работа која е испишана на 30 страници. Правилникот помина на стручен колегиум и на управен одбор на клиниката и пред неколку дена е даден на потпис во Министерството за здравство“, објаснува д-р Јоксимовиќ. Тој не одговори дали одлуката е незаконска, со оглед дека на сите клиники се уште им важат старите дозволи за дополнителна дејност кои важат додека не се добијат новите. Тој тврди дека забраната не е од сега, туку од пред два месеци, и од тогаш лекарите знаат да не закажуваат прегледи.

И правниците се согласуваат дека ваквата времена забрана не е законска. „Не може да се забрани некое право времено, зошто се менуваат правилата на игра. До донесување на новите дозволи важат старите дозволи за дополнителна дејност. Доколку ваквата одлука се даде на Уставен суд ќе биде отфрлена“, објаснуваат правните стручњаци.

Од Министерството за здравство велат дека не дале никакви укажувања како клиниките да постапат додека не ги добијат новите дозволи, туку само дека треба да изработат правилници и да го почитуваат Законот.