Оптимизам пред бербата на винско грозје

Ангел Данов

НЕГОТИНО – Стартот на бербата на винското грозје ги седна на заедничка маса винарските визби и министерот за земјоделство, Љупчо Димовски. Целта на вчерашната средба во винарската визба „Бовин“ во Неготино беше да се изнајде најдобро решение за винското грозје. Ресорниот министер на неколку недели пред бербата на грозје е оптимист дека годинава работите се порелаксирани во делот на натрупаните залихи вино. Според него, оваа година визбите имале помалку резерви.

„Можам да кажам дека залихите вино се половина од тоа што го имавме лани и тоа не' радува. Во изминатиот период и Министерството вложи вонредни напори за да обезбеди пласман на македонското вино на странските пазари. За жал, еве и на овој состанок се покажа дека Македонија нема внатрешна потрошувачка каде што може да се продава домашното вино, а се декларираме како винска нација, винарска држава со над 80 винарски визби. Впрочем, и владиниот проект е поттик за лозарскиот сектор да се изградат повеќе винарски визби каде што грозјето би се преработувало во вино, за виното да се пласира на надворешните пазари, а само 5 проценти на домашниот пазар“, изјави министерот Димовски и додаде дека годинава поради помалите залихи вино, имало маневарски простор за договор со визбите за откуп на цела количина винско грозје.

„Следува разговорот околу ревидирањето на цената на двете доминантни сорти ’смедеревка‘ и ’вранец‘, а секако, пред тоа следуваат бербите на високо квалитетните сорти грозје и дефинирање на нивната откупна цена. Но, тоа е помалиот проблем, зашто најголемите количини се ’вранец‘, а 40 отсто е ’смедеревка‘. Проблемот е околу откупот, а понатаму е дефинирањето на цената“, нагласи министерот.

Димовски смета дека годинава нема да се повторат минатогодишните случувања. Не ја исклучи и можноста Владата повторно да ги помогне визбите и лозарите, но за тоа допрва ќе се разговарало. Тој информираше дека Државниот инспекторат за земјоделство ги проверувал информациите дека одделни винарници лани им плаќале на лозарите многу пониски откупни цени од договорените. За оние што не го платиле грозјето, Димовски повтори дека ќе следуваат санкции.

Менаџерот на винарницата „Аневски“ од Штип смета дека со оваа трета средба организирана од Министерството се поблиску до целта да се откупи целиот род на грозје од овогодишната реколта и да има нормална исплата со соодветна цена.

„Виното во шишиња треба да ја промовира Македонија како винска земја. Заедничките настапи мора да бидат дел од стратегијата за развој на винарството во Македонија и тоа е едно од барањата што го поставивме како винарници до Владата. Дел од средствата што се одделуваат како стимулации за лозарите и винарите за откуп на грозје да се пренаменат во маркетиншки цели. Значи, формулата е многу едноставна, меѓутоа треба макотрпно да се работи на тој дел од пазарот“, истакна еден од сопствениците на винарницата „Бовин“, Ѓорѓи Богевски.