Оберто се повлече поради проблеми со срцето

Аргентинскиот кошаркар Фабрицио Оберто неочекувано ја заврши кариерата откако му беа откриени проблеми со срцето. Членот на Портланд почувствувал вртоглавица за време на мечот со Милвоки и не сака да ризикува посериозни последици.

„Морав да го направам тоа за да го заштитам сопственото здравје и семејството. Многу е тешко да се донесе таква одлука, но таа е исправна, не ми преостана ништо друго“, изјави Оберто.

За шест сезони во НБА-лигата, Аргентинецот со италијански пасош четири години мина во Сан Антонио каде освои и шампионски прстен во 2007 година. Следеше трансфер во Вашингтон минатата сезона, а еден ден пред почетокот на годинашново првенство се пресели во Портланд.

Со репрезентацијата на Аргентина освои сребрен медал на Светското првенство во 2002 година кога во финалето загуби од тогашната Југославија. Златен медал, и тоа олимписки, Оберто освои во 2004 година на Игрите во Атина, а колекцијата ја заокружи со бронза на ОИ во Пекинг 2008 година.

Резултати: Оклахома - Портланд 107:106, Чикаго - Њујорк 112:120.