Обамa ќе стави крај на затворот во Гвантанамо
ВАШИНГТОН - Новоизбраниот американски претседател Барак Обама изјави дека има цел да го затвори затворскиот центар во заливот Гвантанамо и да стави крај на тортурата во САД за две години откако ќе ја преземе претседателската функција. Обама изјави за списанието „Тајм“ дека има цел да ја обнови рамнотежата меѓу американските безбедносни потреби и Уставот.
Досегашниот потпретседател Дик Чејни рече дека не гледа како објектот во Гвантанамо може да биде одговорно затворен додека не заврши „војната против тероризмот“. Тој, исто така, го оправда снабдувањето со вода за некои затвореници за време на сослушувањето. Тој рече дека техниката што симулира давење е соодветно средство да се извлечат информации од осомничените, како што е Калид Шеик Мохамед, наводниот организатор на нападите врз САД на 11 септември.
Новоизбраниот претседател Обама даде изјава за „Тајм“ бидејќи е прогласен за личност на годината, како што истакнува списанието, за „самодовербата да се скицира амбициозна иднина во мрачен момент“. На прашањето како гласачите би знаеле дали неговата администрација ќе биде успешна за две години, Обама наведе серија репери што ги постави неговиот тим за време на претседателската кампања. „Во однос на надворешната политика, дали го затворивме Гвантанамо на одговорен начин, ставивме јасен крај на тортурата и ја обновивме рамнотежата меѓу барањата за наша безбедност и нашиот Устав?“, рече тој.
Јасно е дека новоизбраниот претседател Обама сака драстично да ја смени американската надворешна политика, јавува дописникот на Би-Би-Си од Вашингтон, но критичарите истакнуваат дека затворањето на воениот затвор нема да биде лесна задача. Во објектот се' уште се затворени 250 лица, од кои дел изразија загриженост дека ќе бидат прогонувани ако се вратат во своите матични земји, јавува дописникот. (Би-Би-Си) |
