Пролет од понеделник

Во наредните денови времето одново ќе се стопли

Пролетното време се' уште не сака да си замине од Македонија. Неколкуте постудени денови уште денеска ќе бидат заменети со потопли, а дневните температури ќе пораснат за пет Целзиусови степени. Наредната недела повторно не' очекува пријатно време, па веќе в понеделник и во вторник температурата ќе достигне 19 Целзиусови степени.

Студениот бран што дојде од север донесе дожд во пониските места и снег на планините. Така, во Лазарополе беше формирана снежна покривка од 20 сантиметри. На Попова Шапка наврнаа 12 сантиметри, во Маврово 6 и на Кожув 2 сантиметра снег.

Во Македонија во наредните денови ќе имаме променливо, облачно и потопло време со сончеви периоди. На одделни места ќе биде значително облачно со повремен дожд и ќе дува умерен ветар, а во понеделник и засилен ветар од јужен правец. Од Управата за хидрометеоролошки работи на Македонија информираат дека и утринските температури ќе бидат позитивни и ќе се движат меѓу 2 и 10 степени.

„Утре живата во термометарот во текот на утринските часови ќе се движи меѓу 3 и 9 степени, а во текот на денот од 11 до 17 степени. В понеделник и во вторник дневните температури ќе се искачат за два степена, а минимална разлика ќе има во утринските температури. В среда дневната температура ќе се искачи до 18 степени, а в четврток до 16“, вели Душанка Танушевска, дежурна синоптичарка во УХМР.

За разлика од кај нас, зимата се' поупорно тропа на вратите во соседството. Во Хрватска веќе неколку дена снегот е присутен, и тоа во делови на Јадранот, додека во Црна Гора, во регионот на Жабљак, снежната прекривка достигна 33 сантиметри. Снегот направи проблем и во свероисточна Англија, каде што завчеравечер чартер-авион на британската туристичка компанија „Тимсон“ ја промашил пистата на аеродромот во Њукасл и завршил в поле. (Сн.К.)