Воспитувачките обвинуваат за нефер вработувања

Ја прашуваме Владата од каде најде пари за легализирање на 44 вработувања, кои претставуваат зголемување на бројот на вработените во МНР за 15 проценти. По што се тие подобри од нас, кои со години работиме за минимални надоместоци, а сме подеднакви или подобро едуцирани од нив. Нели е почесно Владата транспарентно да каже кои се причините и зошто не сака нас да не' вработи, рече на прес-конференција вчера, Ели Затковска, координатор на штрајкувачкиот одбор на воспитувачките, негувателките и техничкиот персонал на ангажираните со договори на дело во градинките во Карпош и во неколку градови во Македонија. Овие 320 лица реагираат на огласот на Агенцијата за државни службеници за вработување на 44 лица, објавен на 16 јуни во дневниот весник „Дневник“.

Тие вчера ја обвинија Владата за дискриминаторски и крајно навредлив однос кон нив како кон невработени, кои иако работат по неколку децении, се' уште имаат легитимно нерешен статус. Тие изразија сомнеж дека Владата води тенденциозна политика, за што сметаат доказ се сите нивни досегашни протести и штрајкови за кои и се покажува дека се оправдани. (Сн.К.)