Брисел призна кршење на малцинските права во Унијата
Европарламентот бара да состави дефиниција што е малцинство и кои се неговите права
Од нашиот дописник
Слободанка Јовановска
Брисел - Комитетот за цивилни слободи во Европскиот парламент бара да стане фундаментално право во ЕУ зборувањето и образувањето на малцинските и регионалните јазици, поради разочарувачката состојба сега и тенденцијата на земјите-членки да ја држат оваа тема надвор од компетенциите на Брисел. Ваквото барање тие го изнесоа во извештајот за човековите права во ЕУ, прв по 2004 година, иако таков извештај Брисел секоја година прави за земјите во светот и врз основа на него ги позиционира односите спрема нив.
Во него се констатираат сериозни прекршувања на човековите права во Унијата, па дури се изнесуваат и обвинувања дека во некои земји Ромите се цел на намерни пукања, на труења, насилни напади и фреквентно оспорување на нивните права, кое кулминираше со собирање на отпечатоците од прстите во Италија.
Во однос на делот што најмногу не' интересира - малцинствата, Комитетот бара да се направи дистинкција меѓу антидискриминаторската политика и политиката на заштита на малцинствата, зашто, повикувајќи се на првата, земјите- членки ја негираат потребата од посебни права за малцинствата. Притоа, ЕП бара од Унијата да состави дефиниција за тоа што е малцинство и кои се неговите права, со особено внимание тоа да се однесува на претставниците на малцинствата кои зборуваат посебен јазик.
„Има ургентна потреба да се создаде модел за ефективно политичко учество на малцинствата во процесот на донесување на одлуките, и тоа да биде постигнато со разни форми на автономии или сопствено управување“, се предлага во извештајот, а тоа е нешто што ние би го превеле како некаков рамковен договор за земјите-членки на Унијата. Жално е, според Комитетот, што земјите-членки, со притисоците да не се зборува за малцинските права во ЕУ го уриваат кредибилитетот на Брисел во спроведувањето на надворешната политика и човековите права, или поедноставно кажано ја срамотат Унијата и и' ги врзуваат рацете кога треба да ги оценува и критикува земјите кои не можат да се пофалат со демократија.
Затоа, Комитетот бара човековите права во ЕУ генерално да бидат анализирани на ист начин како и тие во другите земји во светот, односно како внатре така и надвор, за да престанат критиките за двојни стандарди на Брисел. Комитетот, исто така, изнесува сериозни критики за политиката спрема имигрантите, бидејќи недостигот на стратегија за нивно интегрирање предизвикува стотици илјади од нив реално да бидат исклучени од општеството, да станат ранливи и да бараат решение во радикализацијата. Комитетот оди дотаму што бара да се спречат и неонацистички инспирираните концерти, покрај сите манифестации на нетрпеливост спрема малцинствата, Ромите, имигрантите и други незаштитетни групи со законодавството на ЕУ.
Во извештајот нема ниту еден конкретен пример ниту конкретна земја, бидејќи земјите-членки не дозволуваат веќе со децении да се отвора оваа тема, па ни генерално, што покажа извештајот од 2004 година, кој беше отфрлен на парламентарната седница, па по многу „пиши- бриши“ усвоен подоцна. Извештајот ја објаснува и реакцијата на ЕК на писмата од Македонија за кршењето на човековите права во Грција и за инцидентот во Лерин, која беше одраз на немоќта и немањето компетенции во таа сфера, нешто што станува премногу очигледно со оглед на промените во другите делови на планетата.
По фасцинираноста во Европа од изборот на Афроамериканец за претседател во САД и од храброста на Американците да направат таков демократски чекор напред, се' потешко му станува на Брисел да објасни како може ЕУ да се смета за лидер во демократијата, а во некои од земјите да нема елементарни права за малцинствата, а има ваков хорор спрема Ромите. Со приемот на дванаесетте нови земји-членки тој проблем стана уште поголем, но напорите на Брисел да направи пробив во оваа сфера и да го отвори ова прашање наидуваат на многу сопки. |
