Шестгодишно дете од Тетово се затру од инсектицид

ТЕТОВО - Шестгодишно дете од сувогорското село Гургурница, Тетовско, испило инсектицид, се затруло и починало. Иако семејството и соседите брзо реагирале, сепак, не успеале да му го спасат животот. Детето најпрво било пренесено во Клиничката болница во Тетово, а оттаму упатено на скопските клиники, но напорите биле безуспешни.

Според кажувањето на мајката на детето, 38-годишната Ц.Е., во вторникот вечерта малку пред 21 часот, шестгодишникот пројавил знаци на мачнина. Констатирано било дека детето претходно нашло пластично шише со инсектицид, течност подготвена за уништување инсекти во куќата. Притоа испило една количина од течноста за набрзо потоа да се пројават симптоми на мачнина. Испиениот инсектицид бил кобен за животот на детето.

За вчера беше најавена обдукција на телото на детето. Истовремено, домашните го очекуваа и враќањето на таткото, кој бил печалбар во Италија. Тетовската полиција извршила увид на местото. Шишето со отровната течност било земено и предадено на вештачење. Најавено е расветлување на сите детали поврзани со овој несреќен случај. (Г.Е.)