Обвинетите тврдат дека не правеле дубари со инвалидски пензии

Љубица Величкова тврдеше дека за напливот на предмети бил информиран и министерот за здравство

Љубиша Станковиќ


Со распит на второобвинетата Љубица Величкова (50), началничка на Комисијата за оцена на работната способност во прв степен при Фондот за пензиско и инвалидско осигурување, вчера во Основниот суд Скопје 1 продолжи судскиот процес против 36 лица, обвинети во случајот наречен лажни инвалидски пензии, или „Метастаза“.

Во својата одбрана Величкова кажа дека од обвинетите ги познава само своите колеги - лекари со кои соработувала, почнувајќи од првообвинетиот Сашо Јосимовски, за кого рече дека го знае, бидејќи ја лекувал, но отфрли каква и да е поврзаност со некакво криминално здружение. Величкова токму за Јосимовски рече дека го гледала поради одредени „партиски случувања“.

За најголемиот дел од големата група обвинети Величкова кажа дека прв пат ги видела во судница, а третообвинетиот Азем Кофрц го знае како пациент на Милчо Демерџиев, според телефонски разговор што го имала со него. Од разговорот таа разбрала дека Кофрц барал инвалидска количка.

За Љупчо Бутевски, кој, исто така, се води како еден од организаторите на групата, рече дека го знае по тоа што го заштитувал нејзиниот син. Обвинетата Величкова смета дека е апсурд да се поверува во тоа дека имала моќ да влијае врз комплетната лекарска комисија. Таа појасни дека имала средба и со министерот за здравство, Бујар Османи, и дека тој бил информиран за зголемениот број предмети што, пак, кај неа се појавило сомневање за исправноста на пристигнатата документација. На истата тема сега обвинетата Величкова имала разговор и со својот колега Сашко Кедев, чиј потпис, исто така, бил фалсификуван во некои предмети.

Третообвинетиот Азем Кофрц пред судот негираше дека посредувал при издавањето инвалидски пензии. Тој се бранеше дека со некои од лекарите се познава, бидејќи и тој и неговиот татко имале нарушена здравствена состојба. Исто така, за некои од лекарите тој кажа дека ги консултирал телефонски, но судот му предочи доказ од кој може да се заклучи дека со некои лекари се слушал многу често.

По одбраната на Кофрц, односно по направената пауза, судот од оправдани причини донесе одлука за прекратување на судењето, а веќе денеска во судницата треба да се појават сите обвинети за случајот „Метастаза“.