Претходен број

Пресудата за Тарчуловски очекувана за експертите

Пресудите на Хашкиот трибунал одговараат на изведените докази и на обвинението, д-р Гордан Калајџиев

Молк по првичното соопштување на пресудата од Хаг кај експертите по кривично право. Ова е првичниот впечаток по вчерашното соопштување на пресудите, бидејќи кривичарите, генерално, не беа расположени за коментар и само мал дел од нив се одзваа на поканата на „Утрински весник“ да дадат изјава.

За оние што, сепак, прифатија да го искажат својот став и тоа половина час по изрекувањето на пресудата, одлуката на Кривичниот суд на Хашкиот трибунал не била изненадувачка. Според нивните прогнози, судскиот процес завршил онака како и што очекувале: со ослободителна пресуда за Љубе Бошкоски, како и со осуда за Јохан Тарчуловски, но со една ограда дека не сакаат да се впуштат во оцена на висината на изречената казна.

„Пресудите на Хашкиот трибунал одговараат на изведените докази и на обвинението“, смета професорот по кривична постапка, д-р Гордан Калајџиев. Тој вели дека согласно со нашиот кривичен систем, каде што истрагата им припаѓа на јавниот обвинител и на истражниот судија, не било тешко да се предвиди ваков исход, бидејќи е тешко докажлива вината на ексминистерот за внатрешни работи, Љубе Бошкоски. Според него, тој момент мошне умешно го употребила одбраната на Бошкоски. Тој вели дека сосема поинкава ситуација има кај Тарчуловски, каде што се цени неговата индивидуална одговорност, како и неговото учество во параполициска формација.

„За мене лично не беше неочекувана пресудата за Тарчуловски, бидејќи и самото обвинение беше доста посилно за него. Моментно е значајно да се види пишаната пресуда и оттука, ако има елементи, да се оди на жалбена постапка. Но, значајно е да се преиспитаат можностите, бидејќи Трибуналот во неколку наврати, во случаите каде што таа беше иницирана, ја зголеми затворската казна на одредени лица наместо да ја намали, како што тоа обично се очекува“, е првичниот коментар на д-р Јана Лозановска, експерт по меѓународно хуманитарно право.

Според нејзините првични импресии, иако Трачуловски се товареше за индивидуална кривична одговорност за здружен злосторнички потфат, во суштина иако не експлицитно, се осуди за де факто командна одговорност, што е поразлично. Едната е според член 7 (1) на Статутот, а втората согласно член 7 (3) .

„Велам, таква ми е импресијата, бидејќи се' уште ја немам видено пишаната пресуда, која по разгледувањето ќе даде одговор на ова прашање“, нагласува Лозановска.

Вчера се обидовме да стапиме во контакт со сите оние теоретичари, чиишто имиња нешто значат во македонското кривично право. Но, професорите по кривично право не беа достапни за коментар околу судскиот епилог во Хаг. Мобилниот телефон на професорката Гордана Лажетиќ беше исклучен, линијата на професорот Никола Тупанчевски, иако беше слободна, тој не се јавуваше. Веќе подолго време од јавни коментари се воздржува и најпознатиот македонски кривичар, академик Владо Камбовски.

Ниту професорот по кривично право во пензија, д-р Ѓорѓи Марјановиќ, вчера не беше расположен за давање изјави за медиумите. На неговиот домашен телефон се јави еден од неговите синови, кој рече дека „татко му не може да даде изјава“. (Г.Д.)