Претходен број

Поделени емоции по пресудите во Хаг

Ставови околу пресудите дадоа единствено Владата, ВМРО-ДПМНЕ и ЛП, додека повеќето партии молчеа

Жаклина Хаџи-Зафирова

Задоволство и истовремено разочарување беа првите реакции од Владата и дел од македонските политички партии околу ослободителната пресуда за поранешниот министер за внатрешни работи Љубе Бошкоски и дванаесетгодишната затворска казна за полицискиот функционер Јохан Тарчуловски. Вчера, експресно, свои ставови околу двете пресуди дадоа единствено Владата, ВМРО-ДПМНЕ и ЛП, додека повеќето партии од македонскиот и од албанскиот политички блок вчера одбија да ги коментираат пресудите на Хаг и се одлучија да не се истрчуваат со коментари.

Задоволството од пресудата за Бошкоски вчера не ја криеја во Координативното тело за пречек на Љубе Бошкоски и Јохан Тарчуловски, кои најавија дека денеска ќе организираат пречек на Бошкоски на скопскиот аеродром, а свечен пречек е најавен и на плоштадот „Македонија“. Бошкоски, најверојатно, ќе го пречекаат и неговите роднини и пријатели од родното тетовско село Челопек, кои вчера се радуваа на пресудата за нивниот роднина и соселанец Љубе. Некои од нив рекоа дека ќе дојдат во Скопје за да го пречекаат, а други ќе му честитаат за пресудата во неговото родно Челопек.

Само еден час по изрекувањето на пресудите, Владата вчера испрати соопштение во кое ја поздрави одлуката на Хашкиот трибунал за ослободување на Љубе Бошкоски. „Наедно, искрено жалиме за пресудата за Јохан Тарчуловски и се надеваме дека во натамошната жалбена постапка во Хашкиот трибунал на Тарчуловски ќе му биде овозможено да го изложи својот случај и да ги предочи фактите. Владата и натаму останува на својата целосна п��ддршка за одбраната на Тарчуловски и во помошта при изложувањето на фактите, до целосното завршувањето на процесот во Трибуналот“, се истакнува во соопштението на Владата.

Ваков став имаа и во ВМРО-ДПМНЕ. Илија Димовски од оваа партија вчера во името на партијата го изрази задоволството во однос на ослободителната пресуда за Љубе Бошкоски. „Со оваа пресуда се докажува дека институциите на државата во 2001 година имале легитимна активност во насока на заштита на државните интереси на Македонија“, изјави Димовски. Во исто време, според него, партијата изразува разочарување во однос на пресудата за Јохан Таруловски. „Доколку Судот направеше целосна и издржана анализа на целокупната доказна материја приложена до него и од страна на Обвинителството и од страна на одбраната, во тој случај ќе се утврдеше дека обвинетиот Јохан не е виновен“, вели тој. Во ВМРО-ДПМНЕ се надеваат дека во жалбена постапка ќе се отстранат одредени контрадикторности, со што ќе се докаже дека обвинетиот Јохан не ги прекршил правилата на постапување и не сноси одговорност. Затоа, ВМРО-ДПМНЕ апелира до државните институции да вложат максимални напори во поддршка на понатамошните постапки на одбраната на Тарчуловски.

Слични емоции дели и лидерот на Либералната партија Стојан Андов, кој вели дека го радува веста за ослободувањето од вина на Љубе Бошкоски, но истовремено жали за казната што ја доби Тарчуловски. „Сепак, се надевам дека постојат добри основи за намалување на казната на Тарчуловски. Верувам дека жалбениот суд дополнително ќе ги земе предвид аргументите на одбраната и оти по завршувањето на второстепена постапка, казната драстично ќе се намали и ќе се сведе на времето поминато во притвор“ коментира Андов.

Задоволство и жалење вчера изразија и од Координативното тело за пречек на Љубе Бошкоски и Јохан Тарчуловски. „Моментно сме задоволни и среќни што македонскиот маченик и патриот Љубе Бошкоски излезе како слободен и се докажа македонската правдина и оти Македонија не е геноцидна држава. Со големо жалење ја слушнав пресудата за Јохан Тарчуловски. Сметам дека е неправедно осуден, но Хашкиот трибунал и Судскиот совет го кажаа своето. Ние ќе продолжиме со поддршката и борбата за докажување на правдата и колку што може ќе помогнеме за ослободување и враќање на Тарчуловски во Македонија“, изјави Игно Стојков на вчерашната прес-конференција на телото.

Мирослав Спировски од Координативното тело соопшти дека денеска ќе организираат пречек за поранешниот министер за внатрешни работи Бошкоски на аеродромот „Александар Македонски“, но посочи дека се' уште не се знае точното време на неговото враќање. Тој ги повика многубројните граѓани, кои се обратиле до нив, спонтано да се соберат и да го пречекаат Бошкоски на аеродромот.

Според информациите со кои тие располагаат, Бошкоски по враќањето во Скопје ќе биде примен од премиерот Никола Груевски, а потврдена е негова средба со поглаварот на Македонската православна црква г.г. Стефан.

На плоштадот „Македонија“ во Скопје денеска ќе биде организирана и свеченост по повод враќањето на Бошкоски од Шевенинген. Организатори на овој настан се ансамблот „Гоце Делчев“ и фестивалот на нови македонски родољубиви патриотски песни „Гоце фест“, чиј почесен претседател е поранешниот македонски министер за внатрешни работи.

Пречек на Бошкоски ќе организира и Здружението на бранителите „Достоинство“, кое ги повика сите граѓани и симпатизери да го пречекаат Бошкоски денеска во 19 часот на скопскиот аеродром. И тие, исто така, изразија задоволство од пресудата за Бошкоски, но и револт од пресудата за Јохан Тарчуловски. „Особено сме згрозени од висината на пресудата“, рече претседателот на Здружението „Достоинство“ Стојанче Ангелов на вчерашната прес-конференција.