Груевски не брза: Ребаланс на буџетот најрано во мај
Премиерот прогнозира дека растот на БДП за последниот квартал лани ќе биде понизок од планираниот
Александрија Стевковска
Нема потреба од итен ребаланс на буџетот, смета Владата. Таа се оглуши на сите повици на експертите, на опозицијата и на ММФ за ребаланс на буџетот, кој би се направил веднаш, зашто тоа би бил единствен начин да се стегне ременот на јавната потрошувачка, која државава може да ја турне во финансиска бездна.
Останувањето на курсот за мегаломанско буџетско трошење се случува во време кога сите држави се обидуваат да ги ревидираат проекциите за трошење преку ребаланси на буџетите, како што е случајот со Хрватска, или пак Србија, која најавува кастрење на платите и на пензиите. Наспроти финансиските прегрупирања во другите земји, кај нас Владата, за да ги покрие буџетските дупки, наголемо се задолжува, и тоа по висока цена.
Нашата Влада засега тврди дека нема проблем со буџетот, иако признава дека приливите во него се намалени.
„Немаме проблеми со буџетот за какви овие денови на кампања обвинува опозицијата.
Се разбира дека има малку помалку приливи од проектираните поради светската економска криза, но не се во таков износ да претставуваат сериозен проблем за функционирањето на буџетот и на државните институции“, изјави вчера премиерот Никола Груевски.
Според него, најверојатно ребалансот ќе се сведе на вообичаеното донесување во јуни и октомври, евентуално малку порано некаде во втората половина на мај.
Премиерот кусо се осврна и на движењето на бруто-домашниот производ за минатата година, за кој Заводот за статистика се' уште ги нема обелоденето бројките, иако се пробиени сите рокови за тоа. Тој, сепак, очекува помал раст на БДП, не сакајќи да го каже тоа преку бројки. „Во првите три квартали минатата година растот на БДП изнесувал 5,7 проценти и очекувам наскоро да го добиеме резултатот и за четвртиот квартал, кој веројатно ќе биде понизок затоа што во октомври настапи светската економска криза и поради нејзиното влијание во Македонија“, истакна вчера Груевски. (А.С.) |
