Другата недела ќе се знае дали ЈАТ ќе влезе во МАТ
Детали од договорот за преземање на домашниот авиопревозник МАТ од страна на „ЈАТ ервејс“ ќе бидат познати во текот на следната недела. Ќе ги соопштат претседателот на Управниот одбор на ЈАТ, Саша Влаисавлевиќ, и генералниот директор на МАТ, Златко Петровски, откако ќе ги прецизира заедничка комисија која моментно работи на нив. Со преземање на дел од акциите во МАТ, двете компании ќе започнат стратегиска соработка, пред се' во техничкиот дел на користење и одржување на авионите на МАТ, како и заедничка обука на кадри.
Истовремено, нагласуваат во националниот авиопревозник, преку соработката во иднина можат да се спречат отпуштањата на вработени кои беа најавени, како и да се отворат редовни летови кон поголем број дестинации низ Европа, како што се Брисел, Амстердам и Париз. МАТ моментно преговара со уште две компании за влез на странски капитал во компанијата, за кои ќе бидат обелоденети детали следната недела.
Во меѓувреме, од домашната авиокомпанија уште еднаш потенцираат дека по иницијатива на Агенцијата за цивилно воздухопловство и в.д. директорот Зоран Крстевски, во Швајцарија во тек е измена на билатералниот договор за авиосообраќај меѓу двете земји. Во компанијата сметаат дека активностите на Агенцијата се во спротивност со напорите на Владата за одржување на редовниот авиопревоз во државата. Во МАТ реагираат на тоа што измената на билатералниот договор им се прави зад грб, иако на средбата во Берн присуствуваат претставници на сите швајцарски авиокомпании.
„За измените нема никаква причина, што е дополнителен повод за сомневање. Иако официјално побаравме одговор, од Агенцијата се' уште не сме информирани дали договорот се менува или дополнува и зошто се прави тоа. Вакви постапки водат само кон негово рушење“, велат во МАТ. (С.Н.) |
