Не сакаат априлили попис

Партијата на Имер Селмани одржа протест со кој бараше пописот, наместо во април, да се одржи во јули

„Зошто Владата на ВМРО-ДПМНЕ и ДУИ толку многу инсистира да го донесе овој исклучувачки закон за стотици илјади Албанци? Дозволете јас, Имер Селмани, ваш брат, уште еднаш да ја прашам албанската партија на власт, која е причината зошто тие толку многу инсистираат да го спроведат пописот во април? Дали е зборот што му го имаат дадено на Груевски или се тесните лични интереси што им ја заглавиле опашката, па не можат да мрднат?“ На овој начин претседателот на Нова демократија, Имер Селмани, вчера пред празната зграда на Собранието им се обрати на владејачките партии, особено на својот политички опонент ДУИ, порачувајќи им да не го гласаат законот за пописот, кој, како што рече, ќе избришел над 30 проценти од албанското население во Македонија. На протестот под мотото „Не се попишуваш, не постоиш“, се собраа околу две илјади граѓани што носеа транспаренти, вееја албански знамиња и по некое на САД и на ЕУ, но немаше ниту едно македонско знаме.

„Не сакаме априлили попис“, „Стоп за национализмот“, „Ќимо (се мисли на Абдулаќим Адеми), „Колку се 500.000+300.000 Албанци“ беа само дел од пораките со кои Нова демократија вчера го изрази незадоволството за законот за попис.

Од ДУИ вчера ги осудија методите со кои Нова демократија го загрозувала пописот. „ДУИ изразува жалење зашто една партија како што е Нова демократија, која себеси се прокламира како модерна, со европски визии, за мултиетничка Македонија, се служи со методи, како што се бојкот, уценување и опструирање, како начин за изразување незадоволство кон одреден политички проект. Бојкотирањето претставува реален ризик да се намали и со тоа да не се претстави реалната бројка на етничките Албанци во земјава. Преку бојкотирањето се загрозува вистинската слика за процентуалната застапеност на населението во Македонија“, изјави Ермира Мехмети од ДУИ. (Св.У.)