Никој од МВР не дојде на судењето на Радмила Шекеринска
Судскиот процес се одложи, бидејќи МВР не добило достава, а по само неколку часа реагираа со соопштение
Љубиша Станковиќ
Никој од Министерството за внатрешни работи, вклучувајќи ја и министерката Гордана Јанкулоска вчера не се појави на судењето што по приватна тужба на МВР беше иницирано против поранешната лидерка на СДСМ, Радмила Шекеринска. Таа, пак, во придружба на адвокатот вчера се појави во скопскиот кривичен суд. Тужбата против неа не се отфрли по автоматизам, бидејќи судот констатираше неуредна достава, односно немање доказ дека приватниот тужител примил покана за судење. Поради оваа правна пречка, судот го презакажа процесот за февруари идната година.
„Денеска дознаваме дека во Македонија, покрај тоа што не може да се најде пратеникот Хисен Џемаили, полицијата не може да ја најде и министерката Гордана Јанкулоска. Ова е срамота не само за Министерството туку и за Македонија, бидејќи МВР по една смешна и скандалозна тужба не се појавува на судењето. Македонија е единствената држава во која министерката на полицијата поднесува тужба во името на МВР само затоа што некој во време на изборна кампања ги критикува!“, изјави вчера Шекеринска, која се товари дека во време на изборната кампања го навредила МВР.
Шекеринска испрати порака до МВР да престане да владее со страв, „бидејќи ниту таа, ниту опозицијата ќе замолчат за огромните злоупотреби“, и најави дека случајот ќе го изнесе и пред меѓународните судови.
Иако од МВР никој не се појави во Основниот суд Скопје 1, тие неколку часа потоа испратија соопштение во кое истакнуваат дека „Радмила Шекеринска, на митинг што се одржал на 23 мај оваа година во населбата Аеродром, без никаква основа ја навредила полицијата со непроверени и неточни податоци“. Кажаното, за МВР претставува чин кој не му прилега на сериозен политичар. Оттаму потсетување дека Шекеринска кажала дека „стравот повторно го сее полицијата“, претходно посочувајќи дека „уште еден новинар, уште еден снимател, уште еден носител на слободата на мислата бил истепан. Не бил истепан од криминалци, ниту бил истепан од некој невнимателен граѓанин“.
МВР тврди дека зад нападот стои 27-годишно лице од Скопје со прекар Петел, познат како сторител на повеќе кривични дела и дека мотив за нападот е претходна расправија со лице со прекар Лудо и неговата девојка, која избегала од пицеријата „Томас“.
На соопштението на МВР, Шекеринска од Собранието вчера порача дека „станува очигледно дека Џемаили и Јанкулоска се заедно во бегство и не планираат да се јавуваат кога ќе бидат повикани од судските органи!“. За неа е интересно тоа што кога портпаролот на МВР, Иво Котевски, ќе биде повикан од судот, тој не се јавува, но затоа, пак, кога е повикана министерката Јанкулоска тој настапува во нејзино име. Пратеничката Шекеринска смета дека „министерката Јанкулоска со непојавување во судот не ги почитува државните институции, односно законите ги применува селективно“.
Шекеринска смета дека некој треба да понесе одговорност за се' она што се случуваше во мај и јуни оваа година, а не да се поднесуваат приватни тужби. Таа е на мислење дека е добро што МВР ретерира, но дека тоа е само поради тоа што за овој случај се информирани сите меѓународни институции. |
