Слободан Томиќ ќе ја тужи МРТ

Светлана Унковска

Авторот на емисијата „Отворено со народот“, Слободан Томиќ, најави дека ќе поднесе тужба против МРТ затоа што јавниот радиодифузен сервис не го испочитувал целосно договорот во однос на неговата емисија. Од Советот на МРТ велат дека договорот со продукцијата на Томиќ, „Кралот Александар Македонски“ имал важност една година, чиј рок истекол на 3 јули годинава, а членовите донеле едногласна одлука да не се продолжува договорот.

Советот на МРТ завчера го отфрли приговорот на Томиќ и вели дека останува на ставот од претходно донесената одлука да не се продолжува договорот со Томиќ. Образложението тогаш беше дека рејтингот на „Отворено со народот“ бил многу низок, самата емисија не е соодветна за националниот радиодифузен сервис и дека не го остварува јавниот интерес на граѓаните.

Генералниот директор на МРТ, Ефтим Гаштов, не сака да ја коментира ниту најавата на Томиќ дека ќе поднесе тужба и дека ќе ја почитува која било одлука што ќе ја донесе Советот. „Тоа е неговото право и ќе оставиме судските инстанции да одлучат кој е во право. Сметам дека треба да ги почитуваме одлуките на Советот на јавниот радиодифузен сервис според кој договорот за оваа емисија е завршен и дека нема опција за негово продолжување“, ни изјави Гаштов.

Томиќ, пак, својата закана за тужба ја темели на фактот дека МТВ не го испочитувала во целост договорот во однос на неговата емисија.

„Договорот за соработка и емитување на емисијата во договорниот рок не беше почитуван во однос на термините и на времетраењето на емитувањето, кој беше менуван во дури 22 емисии. Последните четири емисии времето на емитување беше скратено на 60 минути, односно 65 наместо таа да трае 90 минути и тие почнуваа со големо задоцнување“, вели Томиќ во писменото предупредување испратено до Советот, УО и до извршните директори на МРТ. Укажува и дека според договорот, емисијата требало да се емитува секој понеделник од 21,21 часот, а не во 20,05 - време кое тој го сметал за несоодветно. Исто така, тој бара да му бидат обезбедени термини за уште две емисии, кои не биле емитувани поради тоа што се паднале на Нова Година и Божик. Во спротивно, најавува дека против МРТ ќе поднесе тужба и барање за материјална отштета.

Писмениот допис со приговорот на Томиќ Советот на МРТ на завчерашната седница, на која присуствуваа членовите на Управниот одбор и извршните директори, едногласно беше отфрлен.

„Договорот имал важност една година, кој истекол на 3 јули годинава. Од овој аспект, барањето на Слободан Томиќ во однос на емисијата која повеќе нема да ја има на на��ионалниот сервис, како и неговите закани со суд немаат реална основа“, стои во заклучокот на Советот на МРТ.