БОНО ВОКС

Хуманитарецот дел од финансиска измама?

Хуманитарната фондација „Уан“ на фронменот на составот „Ју 2“, Боно Вокс, се наоѓа под притисок на медиумите и можна истрага поради сомневањата дека познатиот хуманитарец учествувал во финансиски измами. Имено, непрофитната организација, која собира парични прилози и за време на концертите на групата, во 2008 година исплатила само 118 илјади долари во хуманитарни цели, што е прилично мал дел од собраните 9.800.000 долари, пишува „Њујорк пост“.

Според наведувањата на споменатиот весник, потрошени се повеќе од 5 милиони долари на високи плати на неговите вработени, како и купување подароци за државниците при посетите во нивните земји. Тој податок е уште почуден ако се земе предвид дека овие подароци најчесто претставувале симболични ситници, како што се чашки или бележници. „Примарна цел на организацијата е подигнување на свеста на човештвото за проблемот со популацијата. Финансиската помош не е во прв план“, кажа портпаролот на организацијата „Уан“, Оливер Бастон, бранејќи се од нападите на медиумите. Тој додава дека во организацијата владее транспарентност, а гласиштата за високите плати се обична глупост.