МНР ќе ја пребројува дијаспората во Австралија

Во анкетата како место на раѓање, покрај Австралија и Република Македонија, се наведува и Егејска Македонија (Грција)

Обединетата македонска дијаспора со поддршка на Министерството за надворешни работи на Македонија почна анкета за пребројување на дијаспората во Австралија, во која се вклучени четири универзитети од САД и од Австралија и една компанија за истражување јавно мислење. Со објаснување дека ќе се испитуваат врските на македонската дијаспора во Австралија со матичната земја, се покануваат сите наши иселеници од прва, втора или некоја друга генерација да одговорат на многубројни прашања, меѓу кои дури и каква им е финансиската состојба, кому му испраќаат дознаки, какви врски имаат со земјата, колку често доаѓаат во Македонија, имаат ли бизнис-контакти, како го чувствуваат својот идентитет (македонски, австралиски или австралиско-македонски, македонско-австралиски), колку ги следат медиумите во земјава, какви подароци испраќаат во Македонија, кому и слично. Со напомена дека сите податоци се доверливи и дека Универзитетот „Викторија“ гарантира дека до нив нема да има пристап ниту една владина служба, иницијаторите посочуваат дека целта е да се сфатат врските меѓу иселениците и Македонија и тие информации и знаења да и' помогнат на Владата да ја максимизира можната корист од нив. Во прашалникот е вметната и една провокација, односно на прашањето во која држава сте родени, како можни одговори се наведени: Австралија, Република Македонија и Егејска Македонија (Грција). Во прашалникот се бара и мислење за некои политички ставови, од тоа дали Владата на Австралија треба да го признае уставното име на Македонија без одолжување, дали Владата на Австралија би требало да додели 1 милион долари годишно за проекти што ќе промовираат посилни трговски, образовни, културни, туристички, одбранбени и безбедносни врски со нашата земја, дали Канбера треба да обезбеди доволно средства за да се одржи изучувањето на македонскиот јазик и студии при Универзитетот „Меквори“, па и тоа дали австралискиот премиер би требало да ја посети Македонија во следните 12 месеци.

Инаку, не толку одамна, Обединетата македонска дијаспора поведе слична акција во САД, повикувајќи ги сите со потекло од Македонија да се изјаснат така во пописот на населението, кој е во подготовка и во кој за првпат ќе има образец и на македонски јазик. (Н.Р.)