Уште еден мандат за Мијалков и за Тодоровски

Директорите на двете клучни позиции во МВР, задолжени за јавната безбедност и за контраразузнавањето, остануваат во жешките фотелји уште четири години. Владата на седницата одржана на 30 август годинава донела одлука да им го продолжи мандатот за уште четири години. Со тоа директорот на Бирото за јавна безбедност, Љупчо Тодоровски, и во наредните четири години ќе се бори против уличниот и организираниот криминал во земјава.

На одговорната позиција во Управата за безбедност и контраразузнавање, Владата повторно му даде доверба на досегашниот директор, Сашо Мијалков. Ваквата одлука на Владата е објавена во најновиот број на „Службен весник“, со што веќе таа стапи во сила.

Мијалков и Тодоровски беа поставени на раководните функции во УБК и БЈБ во 2006 година, веднаш по доаѓањето на ВМРО-ДПМНЕ на власт.

Работата на полицијата и на првиот човек на Бирото за јавна безбедност, последниве две години беше жестоко критикувана во јавноста, поради повеќето нерасветлени грабежи на банки, киднапирања на деца и сурови убиства сред бел ден, кои предизвикаа чувство на страв и сигурност. (Д.Р.)