ЊуЈорк - Цените на нафтата вчера на берзата во Њујорк повторно скокнаа на рекордна вредност од речиси 120 долари за барел. До ова ново поскапување дојде откако петрохемиската корпорација (Би-Пи) поради штрајк во шкотската рафинерија „Гренџмоут“ го затвори нафтоводот со кој се испорачува третина од нафтата од британските наоѓалишта во Северно Море до рафинериите во Велика Британија, како и поради оружениот напад врз полицијата во Нигерија која го обезбедува најголемиот нигерски терминал за нафта и гас.
Американската лесна нафта за испораки во јуни поскапе за 1,41 долар или за 1,2 отсто во однос на тргувањето од петокот, на 119,93 долари при електронското тргување на Стоковата берза во Њујорк, што е највисока цена од почетокот на терминското договарање во 1983 година. Нафтата на берзата во Њујорк само во текот на минатата година поскапе за 82 отсто.
Нафтата од типот „брент“ во Лондон за испораки во јуни поскапе за 1,16 долари или еден отсто, на 117,50 долари за барел, откако на 25 април ја достигна рекордната вредност од 117,56 долари.
Британската компанија „Бритиш петролеум“ (Би-Пи) вчера го затвори нафтоводниот систем „Фортис“ со кој се пренесува речиси 40 отсто од вкупното британско производство на нафта, односно повеќе од 700.000 барели дневно, откако штрајкот на вработените во рафинеријата „Гренџмоут“ во централниот дел на Шкотска доведе до намалување на испораките. (МИА)
