Промовиран филм за претседавањето со Генералното собрание на ОН

Во постојаната мисија на Катар при Обединетите нации во Њујорк се одржа промоција на документарниот филм за работата на 62. заседание на Генералното собрание „Отворени врати“, со кое претседаваше Срѓан Керим. На промоцијата, покрај Керим, се обратија домаќинот Насир Абдулазис Ал-Насер, постојан претставник на Катар при ОН и продуцентката Бренда Вонгова.

Преку филмот Вонгова и' дава можност на светската јавност да ѕирне зад кулисите на „парламентот на човештвото“. Преку работата на Срѓан Керим, Вонгова во документарецот дава одговор на прашањето колкаво влијание може да имаат посветеноста, проактивноста и личното залагање на претседателот на Генералното собрание во зголемувањето на ефективноста на мултилатерализмот како основна определба на организацијата, како и во соочувањето со новите предизвици пред кои е исправена.

„Овој филм е сведоштво за незаменливата улога на Обединетите нации во справувањето со сите проблеми што го оптоваруваат човештвото. Односно, за нивниот универзален карактер како организација“, изјави Керим.

„Длабоко бев инспирирана да го снимам овој документарец, бидејќи искрено го ценев ангажманот во тимот на Срѓан Керим. Тој не само што беше ефективен лидер и поттикнувач на меѓународни активности на импресивен спектар од критични предизвици на нашето време - вклучувајќи ги и климатските промени и хуманитарната помош - туку и човек со голема љубезност и скромност“, нагласи продуцентката Вонгова.

На промоцијата присуствуваа високи претставници од организацијата на Обединетите нации, дипломатскиот кор и други еминентни гости од градот Њујорк. (Д.Р.)