Македонија поканета на самитот на НАТО

Делегацијата ќе ја предводи претседателот Иванов, а ќе учествуваат и министрите Коњановски и Милошоски

Тамара Грнчароска

Македонскиот претседател Ѓорге Иванов ќе ја предводи македонската делегација на самитот на НАТО во Лисабон на крајот од ноември. Во делегацијата ќе бидат и министрите за одбрана и надворешни работи, Зоран Коњановски и Антонио Милошоски.

Според неофицијални информации, македонскиот лидер, сепак, нема да учествува на средбата на НАТО-лидерите, туку на состанокот на земјите-контрибутори во мисијата ИСАФ во Авганистан, што ќе одржи еден ден по централниот состанок на Алијансата. На минатогодишниот самит во Стразбур и во Кел Македонија воопшто не беше поканета, а објаснувањето беше дека тоа било така бидејќи самитот бил јубилеен и свечен, а не работен. Освен состаноците на ИСАФ, Македонија последните години практично нема форум на кој би седнала на иста маса со земјите-членки на Алијансата, па мисиите во странство останаа единствената врска што ја држат „жива“ нашата соработка со воениот сојуз.

Македонија до 2008 година ги исполни сите потребни армиски реформи и услови да добие покана за членство, но поради спорот со името тоа не се случи, односно таа беше условена со решавање на проблемот. Иако самитот во Лисабон во политичките кругови се форсираше како еден од роковите за решавање на спорот околу името, како услов да се активира поканата за членство, на дваесетина дена пред неговото одржување извесно е дека македонската делегација ќе замине таму без очекувања дека Македонија како тема ќе се најде на дневниот ред на состанокот.

Македонските власти изминатите недели бараа земјава да биде примена под референцата „ПЈРМ“, но од НАТО демантираа каква било можност такво нешто да се расправа или да се случи, поради одлучувањето со консензус. Дилемата сега е дали во завршните заклучоци ќе биде повторена или не условената покана од Букурешт, поради двојната замка - да биде протолкувано како дигање раце од неа ако не се најде во документите од лисабон или ако се отвори прашањето повторно, да биде испроблематизирана од некои земји-членки што не се задоволни од тоа каде оди Македонија и од тоа до кога е рокот на траење на заклучокот од Букурешт.