Делавекурас: Не е планирана нова средба пред самитот

Атина - Не е планирана нова билатерална средба меѓу шефовите на владите на Грција и на Македонија, Јоргос Папандреу и Никола Груевски, пред самитот на НАТО во Лисабон, изјави портпаролот на грчкото Министерство за надворешни работи, Грегори Делавекурас.

„Немаме планирано средба пред Самитот на НАТО и навистина не мислам дека може да очекуваме таков брз развој на настаните со оглед на случувањата до денес. Сепак, убедени сме дека доколку раководството на ПЈРМ навистина одлучи дека е подготвена за некаков прогрес, тогаш решението навистина може да се случи многу брзо“, изјави Делавекурас на средбата со новинарите во Атина.

Тој посочува дека Атина се надева на напредок што е можно поскоро, што било и грчка позиција, презентирана од политичкото раководство на земјата на сите нивоа и во секоја пригода. Во тој дух, посочи, се одржа и последната средба на Папандреу и Груевски што, всушност, се одвивала во добра клима. „Тоа беше суштествена и неформална средба меѓу двајцата премиера и се надевам дека таа средба ќе создаде можност за промена во ставот на раководството на ПЈРМ, што ќе ни овозможи наскоро да постигнеме решение“, рече Делавекурас. (МИА)