Андреј Петров најави тужба против МВР за кривичната пријава
Пратеникот на СДСМ, Андреј Петров, најави тужба против Министерството за внатрешни работи, кое му поднесе кривична пријава за злоупотреба на службена должност во периодот кога тој бил член на Второстепената владина комисија надлежна за одлучување по жалби и јавни тендери.
МВР обвинува дека комисијата бесправно им овозможила на четири дистрибутери на пиварница „Скопје“да го добијат тендерот за кантини, наместо штипската фирма „МА проком“, која имала најповолни понуди.
Покрај Петров, кривични пријави заработија и уште 11 члена на комисијата и сите се осомничени дека давале под закуп кантини на фирми кои не ги исполнувале условите на тендерот.
„Прекршен е Законот за јавни набавки во кој е наведено дека претквалификацијата на понудувачите се врши врз основа на економски, финансиски бонитет, поради што на скопската пиварница и' било овозможено незаконски да се стекне со имотна корист од 42 илјади евра“, рече портпаролот на МВР, Иво Котевски. Ваквите обвинувања ги отфрли Петров, кој вели дека тој не бил член на таа комисија.
„Доволно е Гордана Јанкулоска, како најодговорен човек во МВР, да отвори ’Службен весник‘ во кој ќе констатира дека од поодамна не сум бил член на таа комисија затоа што извршував друга функција. Ова е обид на ВМРО-ДПМНЕ преку своите партиски војници во МВР да го скрие двојниот аршин на власта. Наместо да постапи по потерницата за притворање на пратениците, МВР поднесува кривични пријави против пратеници на СДСМ, што стана практика на власта секогаш кога има криза во владината коалиција“, истакна Петров. (Св.У.)
|
