| Заврши распитот на групата на Красниќи
Со распит на последните тројца од деветчлената група предводена од кондовецот Агим Красниќи, обвинети за злосторничко здружување, спречување избори и гласање и за недозволено држење огнено оружје, вчера заврши давањето одбрана на главен претрес.
Исказите кои пред Судскиот совет на Основниот суд Скопје 1 ги дадоа Имер Исмаил (29), Рихан Мемеди (19) и Бедри Мемети (30) од село Батинци речиси во целост беа идентични. Судијката Лидија Неделкова инсистираше во нивните искази да бидат содржани повеќе детали кои се однесуваат на настанот од 1 јуни оваа година, бидејќи сите тројца пред истражен судија го користеле правото да се бранат со молчење. Но, обвинетите останаа на тоа дека критичниот ден биле на прошетка со џипот „мерцедес“, дека не познаваат никого од групата кондовци, дека во возилото немало ништо сомнително и дека оружјето прв пат го виделе во полициска станица по нивното приведување. Тие се бранеа со кажувања дека никогаш порано не стрелале од огнено оружје и покрај тоа што од судот, на двајца од нив, им беше поставено прашање дали им е познато од каде кај нив се пронајдени остатоци од нитратни честички. (Љ.С.) |
