Поглед

Лето во Скопје

Билјана Ангеловска

Одамна не сме го виделе Скопје толку празно. Барем не од минатото лето. Но, таа празнотија не го прави градот мртов. Напротив, како да му дава некаква слобода. Се добива впечаток дека градот добил во простор, дека дише послободно.

Улиците како да станаа пошироки, сообраќајот е десеткуван, на тротоарите нема паркирани автомобили, па луѓето можат да се движат комотно. И возд��хот е некако почист. Веројатно поради намалениот број возила. Дури и интензивните градежни работи на повеќе градски сообраќајници се поднесуваат полесно. Автомобилите побрзо се разминуваат на тесните грла, колоните на семафорите имаат крај, не се слушаат сирените, нема нервозни возачи.

Нема турканици ни во автобусите ни во двата дена кога пензионерите можат да се возат без пари. Веројатно и ним им е тешко да излегуваат бесцелно на високите летни температури. Дури и кафеаните работат релаксирано. Лесно се наоѓа слободно место и во најпосетуваните градски кафулиња. И во текот на денот, но и во вечерните часови. И нарачките побрзо стигнуваат. Граѓаните во голем број се надвор од Скопје. Го користат својот летен одмор. И учениците и студентите ги нема. Секој фатил џаде на друга страна.

Сите оние граѓани што се деновиве во Скопје стануваат свесни за неговата реална пренаселеност, за тоа дека луѓето, едноставно, си пречат едни на други во секојдневните активности. И, во ваквите, за жал, ретки моменти како да стануваме љубоморни на граѓаните од помалите градови каде што се живее без турканици. Скопјани го делат тоа чувство само неколку дена во годината. Тогаш станува бесмислена секаква предност да се биде жител на метропола.

Убаво е деновиве да се живее во Скопје.