Олеснувачите и „отежнувачите“ ќе слават во Охрид

Македонија конечно обединето ќе ја прославува годишнината на Охридскиот договор. На конференцијата што идната недела ќе се одржи во Охрид на иста маса ќе седнат Бранко Црвенковски, Арбен Џафери, Али Ахмети и веројатно Љупчо Георгиевски, главните потписници на документот.

Ним ќе им се приклучат олеснувачите Џејмс Пердју, Ален Лероа и Алексис Брунс (ако го потврди присуството), како и амбасад��рот на САД Филип Рикер. Според програмата што ја подготвува Секретаријатот за спроведување на Рамковниот договор, на конференцијата ќе учествуваат исто така претседателот Ѓорѓи Иванов и вицепремиерот Муса Џафери, а на одговорот на премиерот Никола Груевски се уште се чека. Така што, од семејната фотографија од 13 август пред десет години, која стана дел од македонската меморија и историја, ќе недостасуваат Џорџ Робертсон, Хавиер Солана и Франсоа Леотар и секако починатите, претседателот Борис Трајковски и лидерот на ПДП, Имер Имери.

Иако ќе биде работна, со говори и расправа, конференцијата сепак најмногу ќе биде симболична. За првпат од илегала на главната фотографија ќе се најде и лидерот на ДУИ Ахмети, кој тогаш не беше пожелен гостин како потпишувач, а сите политички лидери ќе слават заедно бидејќи мораат, односно бидејќи настанот ги надминува нивните меѓусебни омрази и караници.

Која ќе биде пораката што ќе излезе од конференцијата отсега не може да се каже, но генералната е дека Македонија овие десет години по Охридскиот договор не направила голем исчекор напред и дека се уште се гуши политички внатре.

За 5-ти септември е планирана уште една конференција на која ќе присуствуваат еврокомесарот Штефан Филе, Џејми Шеј од НАТО, Даниел Сервер од САД и повеќето странски амбасадори во земјата. (Н.Р.)