Македонија добила нови услови од ЕУ

„Листата на Санино“ никој не сака да ја каже конкретно

Слободанка Јовановска

Македонија добила нови услови од ЕУ што треба да ги исполни до 5 септември, објави вчера вицепремиерката за евроинтеграција, Теута Арифи, презентирајќи ги своите приоритети во Комисијата за европски прашања во парламентот. Нарекувајќи ги условите „листа Самино“, според врачувачот Стефано Самино, Арифи избегна да ги објави конкретно, но ги наброја областите во кои Македонија мора да направи брзи потези, ако сака да и' биде повторена по третпат препораката за преговори. Според неа, листата не е долга и е краткорочна, а треба да ја спроведат министерствата за внатрешни работи, за информатичко општество, за правда, за локална самоуправа и Секретаријатот за Рамковен договор.

Како што се дознава, Брисел бара ургентни промени околу начинот како функционира јавната администрација, односно да се стави веднаш црта на начинот на кој се вршеа вработувањата досега и да почне да функционира системот на унапредување според постигнувањата. Исто така, конечно, да се изработи регистар на сите вработени во јавната администрација, а, наводно, за тоа веќе почнале активностите во Владата. Околу упадот во медиумските слободи Брисел побарал да се преиспита одлуката за Советот за радиодифузија и за законот во оваа сфера да се отвори јавна расправа.

Исто така, било побарано да се формира работна група што ќе го усогласи законот со европската регулатива, бидејќи вака ја јакне медиумската контрола. Од МВР се барало да стави крај на азилантските бранови, додека Министерството за локална самоуправа треба да подготви план за слабостите во функционирањето и во финансирањето на општините, т.е. како ќе се децентрализираат парите од државно ниво на локално, каде што во најголем дел им е местото.

Арифи вчера беше оптимист дека овие барања ќе се исполнат до рокот, бидејќи извештајот на ЕК треба да биде напишан до средината на септември. Ако се следи логиката на славните осум бенчмаркови претходните години, излегува дека ЕК си бара алиби да ја повтори препораката за преговори на Македонија, бидејќи реална оцена на состојбата би довела до заклучок дека политичките услови веќе не се исполнуваат и неа треба да ја повлечат. Односно, дека наредните 15 дена Владата треба да даде најави или да почне активности што би биле најава дека ќе преземе некои мерки во овие сфери, а не треба ни да се прогнозира што ќе се случува потоа. За потсетување, вакви силни исполнувања на условите имаше и лани до извештајот, а истиот ден откако беше објавен Владата повлече потег со кој сето тоа го доведе во прашање.

За секој случај, Арифи вчера потсети дека ЕУ не е само идеја, туку и средства што и' се даваат на земјата за разни проекти и дека освен што треба да исполниме услови, потребно е да учиме и европски вредности и да ги афирмираме европските идеи, очигледно имајќи ги предвид антиевропските расположенија што се потхрануваат сега во земјата. На крај таа го спомна „клучниот момент“, решавањето на спорот со името на државата. „Има работи што можат да бидат непријатни, но со кои мораме да се соочиме“, рече таа, оценувајќи дека како земја ние сме ја покажале добрата волја за решавање на спорот и дека очекуваме истото тоа да го покаже и другата страна. Кому мислите да му влијаете да се реши спорот, на премиерот Никола Груевски или на грчката влада, и' реплицираше еден од пратениците, порачувајќи и' дека сите знаат дека ќе биде неуспешна како министер ако не се реши спорот со Грција. Јани Макрадули за расправата за медиумите и' порача дека е како „свадба по тапани“ и ја потсети дека додека зборува веќе е во процедура закон што не' оддалечува од ЕУ и кој фрла сенка на нејзините заложби - законот за млади.

Што сме направиле, на 5 септември лично ќе провери еврокомесарот Штефан Филе, кој ќе престојува во еднодневна посета на земјата, ќе има билатерални средби со нашите функционери и ќе присуствува на конференција за Рамковниот договор. Филе со тоа елегантно ќе ја избегне прославата на независноста на земјата три дена подоцна, на која кога би присуствувал, би и' дал легитимитет и алиби на политиката на мегаломански споменици и антиквизација. На истата конференција ќе биде и премиерот Никола Груевски и тоа веројатно е начин да дојде за вистински повод и да ги пренесе неопходните пораки до нашиот естаблишмент.