ЕУ и НАТО да бидат приоритет, бараат стопанствениците
Бизнис-заедницата од северозападна Македонија очекува новата влада да ги исполни ветувањата особено на економски план и да ја третира како нејзин рамноправен, конструктивен партнер при креирањето на политиките за стопанството. „Членството во ЕУ и во НАТО да биде приоритет на новата влада зашто тоа влева сигурност кај домашните и странските стопанственици, претставува гаранција за водење бизнис, а оттука и поголема можност за привлекување инвестиции“, рече вчера на прес-конференција претседателот на Стопанската комора на северозападна Македонија, Мендерез Кучи.
Кучи апелира при формирањето на владата да нема двојни функции зашто тоа ќе значи дополнителен товар за стопанството. Ресорните министри да се избираат во согласност со нивните способности и капацитети за работа, а не според тоа кој колку бил партиски активен или заслужен.
„Формирањето на новата влада веднаш ќе покаже што можеме да очекуваме. Сметаме дека не треба да има дуплирање на функциите со цел задоволување нечии политички апетити“, посочи Кучи.
Стопанската комора на северозападна Македонија оценува дека „со одржаните предвремени парламентарни избори граѓаните докторираа, а политичарите, ако се употреби студентскиот речник“, како што нагласи Кучи, „успешно го положија колоквиумот. Испитот допрва следува“. (МИА) |
