Анонимка и за министерот Коњановски

Лани во јули за злоупотреба на функциите се осомничени 12 директори во РЕК „Битола“

БИТОЛА - Анонимна пријава против министерот за одбрана, Зоран Коњановски, за случајот со наводниот криминал тежок над седум милиони евра во РЕК „Битола“ пред Нова година стасала до Основното јавно обвинителство - Битола. За злоупотреба на службата лани во јули се осомничени 12 директори во РЕК. Пријавата против Коњановски Обвинителството ја смета како дополнување за тринаесеттиот осомничен за кого обвинителот најавува дека ќе постапува следните дена. Предметите за 12 директори на РЕК веќе се процесуирани пред истражен судија во Битола. Обвинителот Петар Аневски вели дека за осомничените директори се собираат податоци и докази.

„Пријавата е во вид известување, но заклучуваме дека станува збор за кривична пријава. Се однесува на случајот со 12 директори во РЕК ‘Битола‘. Тие веќе се во истрага, ќе бараме вештачење. Кривичната пријава против Коњановски ќе мора да ја прифатиме, бидејќи е дополнување“, изјави вчера обвинителот Аневски.

Од СВР-Битола тврдат дека немаат сознанија што би можел да ја поднесе кривичната против тринаесеттиот осомничен, ексгенералниот директор на РЕК, Зоран Коњановски. Од полицијата велат дека секој граѓанин на Македонија против секого може да поднесе кривична пријава.

Министерот Коњановски прв пат од новинарите слуша за кривична пријава против него, меѓутоа, вели дека, како и секој граѓанин, е достапен доколку Обвинителството и истрагата имаат намера да го повикаат на распит. „Не можам да коментирам анонимки додека Обвинителството не излезе со официјален став“, рече Коњановски.

Како што е познато, на 13 јули минатата година битолската полиција поднесе кривични пријави против 12 директори во РЕК, во времето кога на чело на комбинатот беше Коњановски. По ова опозицијата остро реагираше зашто меѓу осомничените од директорскиот тим го нема генералниот директор Коњановски.

„Дванаесеттемина пријавени во текот на 2008 година ги искористиле одговорните функции во РЕК и потпишувале фактури за надворешни правни лица, со кои исплатените средства ги надминале проектираните. Ова го направиле спротивно на вредностите за услуги од работна рака за ремонт на постројки во термоелектрани во Битола, како и спротивно на интерните акти, односно двете известувања што РЕК ’Битола‘ ги доставила на 8 јануари и на 26 јуни 2008 година, за број на извршители и број на работни часови“, рече Ѓоко Стрезовски, портпарол на СВР-Битола, лани во јули на прес-конференција.

Целиот случај се одвивал во неколку сектори на РЕК. Така, во термоелектраните, два директора потпишале 72 фактури на повеќе фирми во вредност од 450 милиони денари, иако услугите за ремонтите не смееле да бидат поголеми од 195 милиони денари, а со уште 86 фактури рапидно се зголемиле работните часови на надворешните извршители. Спротивно на договорените проекции, тоа го направиле и првите луѓе во комерцијалната служба со вкупно потпишани 326 фактури. Во истиот период, директорот на рудникот „Суводол“ потпишал 258 фактури. Опозицијата уште во летото реагираше дека поднесените кривични пријави против директорите во комбинатот се меѓусебни пресметки внатре во владејачката партија и оти злоупотребите се многу поголеми.