Дете се обеси во Дабиле

СТРУМИЦА – Тринаесетгодишно дете од струмичкото село Дабиле си го одзеде животот со бесење. Момчето оставило проштално писмо, упатено до своите родители. Во него, како што велат во истрагата, не биле наведените причините што го натерале детето да посегне по сопствениот живот. Настанот, кој го потресе селото, се случил на таванот во плевната завчеравечер околу 21.30 часот. Таму момчето врзало јаже и се обесило. Безживотното тело на детето го пронашол таткото. Тој веднаш го однел синот во струмичката болница, но тоа веќе бил мртов и лекарите не можеле да му помогнат. Детето било ученик во шесто одделение. Неговото семејство важи за работливо и почитувано.

Од досегашните информации од истрагата се дознава дека детето оставило писмо, во кое само напишало дека ги поздравува своите родители, а немало наведено причини за што си го одзел животот. Оттаму додаваат дека не станува збор за насилна смрт, бидејќи на телото не биле пронајдени никакви знаци на насилство, туку станува збор за класично самоубиство.

Ова е втор случај за неколку дена на малолетници, кои посегнале по сопствениот живот. Во саботата жителите на гостиварското село Долна Бањица беа шокирани од обидот за самоубиство на малолетничка од селото. За среќа, таа не успеала во својата намера, по што е префрлена на лекување во скопските клиники и нејзината здравствена состојба се подобрува. Годишно, во земјава во просек се случуваат 150 самоубиства, а како најчести причини се споменуваат семејните проблеми, сиромаштијата, депресијата и љубовните маки. Само во Гостиварско, од почетокот на годинава се регистрирани две самоубиства и шест обиди за одземање на сопствениот живот со труења со лекови или со други хемикалии. Според информациите од СВР Тетово, во шесте случаи, по својот живот посегнале жени на возраст меѓу 15 и 30 години. (Е.П.-К.К.)