Латас дојде на судење, судијата нуди помирување

Тужениот Драган Павловиќ-Латас вчера се појави на судењето што против него го поведоа неколкумина новинари и интелектуалци, но до судење не дојде. Судијата Љубинка Башевска ги информираше присутните дека кога се поведува судски процес по приватна тужба, првото судско рочиште ќе го искористи како можност за помирување на двете страни.

Застапникот на тужителите, скопскиот адвокат Филип Медарски, рече дека тој и неговите клиенти се подготвени да се произнесат по ваквата можност веднаш, но судот, сепак, донесе одлука да го одложи процесот и да го презакаже за крајот на мај.

Тужбата против Латас е по објавен текст, насловен како: „Грција ги плаќа нивните, а во Македонија своите новинари за да помине грчкиот предлог“. Во својство на тужители и оштетени се јавуваат: Никола Гелевски, Бранислав Героски, Владимир Милчин, Ивица Антевски, Маја Бојаџиева, Џабир Дерала, Лидија Димова, Гордана Дувњак, Ѓунер Исмаил, Жарко Јордановски, Ема Марковска-Милчин, Ида Протугер и Ерол Ризаов. (Љ.С.)