Загина тинејџер од струен удар во Гостивар

ГОСТИВАР - Тинејџер од Албанија загина од струен удар, а две лица претрпеа електричен шок во несреќа што се случи завчера во Гостивар. Тројцата сечеле гранка, влечејќи ја со челична сајла. Во еден момент гранката паднала на далновод и предизвикала струен удар. По десетина минути поминати во кома, здравствената состојба на двајцата повредени се подобрува.

Трагедијата во која животот го загуби дваесет и двегодишниот Илир Т. од албанскиот град Либражд се случила завчера околу 14 часот, кога заедно со сопственикот на нивата, 50-годишниот С.А., со челична сајла влечеле гранка од дрво. Сопственикот на нивата ги ангажирал тинејџерот и неговиот соселанец 62- годишниот И.М. да му помагаат во расчистувањето на гранките од дрвата што се наоѓаат во неговата нива. Гранката не успеале да ја повлечат кон себе и загубиле контрола врз неа, по што таа паднала на далноводот и предизвикала струен удар. Од ударот на самото место загинал албанскиот тинејџер Илир Т., додека С.А. и И.М. доживеале електричен шок и десетина минути биле во бессознание. По освестувањето, ги информирале блиските роднини за несреќата, кои веднаш случај го пријавиле во полиција.

Екипа на гостиварската полиција, дежурен истражен судија и заменик-јавен обвинител извршиле увид на местото на несреќата. Со наредба на истражниот судија, била извршена обдукција врз телото на починатиот. СВР - Тетово работи на целосно расветлување на сите подробности поврзани со овој несекојдневен случај. (К.К.)