ЗАЗА ГАБОР

Ја продава вилата за да го плати лекувањето

Актерската легенда Заза Габор е принудена да ја продаде вилата на Бел ер за да може да ги плати трошоците на лечењето - пренесуваат американските медиуми. Како што наведуваат истите медиуми, здравствената состојба на 93- годишната актерка е се' полоша и полоша. Заза во саботата се вратила дома од болница, а лекарите биле принудени да и' ампутираат три четвртини од ногата.

За продажбата на куќата, медиумите ги известил нејзиниот деветти сопруг, Фредерик фон Анхалт, кој рекол дека сака да ги реши долговите на Заза Габор и да и' овозможи и натаму да живее удобно. Месечните трошоци за животот во вилата им се околу 35.000 американски долари, а тоа веќе не можат да си го дозволат, зашто месечните трошоци за лечењето на Заза се искачиле на 21.000 долари. „Се забавуваше со богати и славни, флертуваше, се мажеше, а не мислеше на иднината“ - изјавил Фредерик фон Анхалт, објаснувајќи како е можно филмската дива пред крај на својот живот да се најде во тешка финансиска ситуација.

Бившата секс-бомба, која ги одбележа 50-тите и 60-тите години на минатиот век, во 2002 година доживеа тешка сообраќајна несреќа. Минатата година, на 17 јули, 93-годишната Заза го скрши колкот паѓајќи од креветот во обид на седне на инвалидската количка. Тешко повредената Заза во болницата е подложена на операција на вградување вештачки колк. Операцијата на замена на колкот не минала најдобро, па следувале многу компликации, а Заза во еден момент била и пред смрт.