Македонските судии „распродадени“ во Европа

Тројцата наши меѓународни фудбалски судии ќе се појават уште во првите натпревари во квалификациите за Лигата на шампионите и Лигата на Европа. На 19 јули Александар Ставрев ќе го суди реванш-мечот од второ коло на Лигата на шампионите меѓу Видеотон (Унгарија) и Штурм (Австрија). Ќе му помагаат Марјан Кировски и Љубомир Крстевски, четврти судија ќе биде Дејан Јакимовски. На истиот ден Димитар Мечкаровски ќе го води реванш мечот од второто коло од квалификациите за Лигата на шампионите меѓу Флора (Естонија) и Шамрок Роверс (Република Ирска). Негови помошници ќе бидат Душко Милошевски, Дејан Костадинов, додека четврти судија ќе биде Марјан Марковски.

И третиот наш меѓународен судија Горан Спиркоски од Прилеп не остана слободен на стартот од еврокуповите. Тој е одреден за главен судија од второто квалификационо коло за Лига на Европа на натпреварот меѓу победникот од средбата Банга (Литванија) и Карабах (Азербејџан) против Стрејмур (Фарски Острови). Мечот ќе се одигра на 21 јули. На Спиркоски ќе му помагаат Игор Ширилов, Кирил Негриевски, четврти судија ќе биде Петар Велјановски. (М.M.)