Насловна

Поглед

Курбан липи

Деспина Трајковска

Скопјани репризно се сведоци на сеча на зеленило од која ќе профитираат, пред се', возачите. Кусо време откако се помири со сечата на багремите на „Илинденска“ јавноста се разбранува со минатонеделното уништување на десетиците липи покрај „Климент Охридски“. И нив ги најде истата судбина, отидоа под налетот ��а моторните пили за улицата да се прошири со една-две ленти. И со овој потег Скопје изгуби уште едни бели дробови, уште една симболика, и тоа не само естетска, туку и еколошка.

Во меѓувреме, на сметка на багремите добивме булевар, а од курбан липите Скопје ќе добие уште една попроточна улица. И од тополите (ќе) имаме жив ќар, но само од сообраќаен аспект. Зеленилото и дотогаш количински изброено на прсти, дефинитивно, отиде во минатото.

Некој ќе рече „ако сакате да живеете во град (Скопје), а да ви биде како на село, сменете ја домашната адреса“. Да, така е, но ниту се чуло ниту се видело да се прави касапница на зеленилото, а притоа да не се планира „подигање“ на нови зелени филтри во градската средина. Во случајов, дрвјата од „Денот на дрвото“ ни малку не се надоместување за масакрот на дрворедите во пренаселениот центар.

Не' задушија во барок, бехатон, лош асфлат... Полека, но сигурно стануваме бетонска џунгла. Не дај боже, принудно ќе дишеме на жабри. Сигурно нема да ни помогнат цветните висечки саксии на градоначалникот Тодоровиќ, ниту, пак, младите дрвца наместа брцнати по соголените предели среде новиот асфалт. Нови зелени оази, парковски површини нема ниту на хартија, а се чини далечни се и како спектакуларно најавени проекти, притоа загарантирани од страна на надлежните. Палмите на Трајановски ни оддалеку не се замена за вековните липи, багреми, тополи...Патем, и тие почнаа да се сушат.