Нотарската такса се намалува за 25,2 отсто

Трошоците и наградата за извршена нотарска работа се намалуваат за 25,2 отсто. Оваа информација вчера ја пласираше министерот за правда, Михајло Маневски, додавајќи дека со овој чекор уште еднаш им се излегува во пресрет на потребите на граѓаните откако претходно беа намалени судските трошоци, а во најава е намалување и на наградата за извршителите.

„Со намалување на трошоците за нотар се олеснува пристапот на граѓаните до правдата и до управните органи“, изјави Маневски.

„Нотарската комора како дел од правосудството имаше слух и се приклучи кон заложбите на Владата во овие кризни времиња да се помогне и да го олесниме пристапот до правдата за граѓаните“, вели претседателот на Нотарската комора, Влатко Николовски.

Намалувањето на трошоците треба да стапи во сила од втората половина на јануари следната година.Министерот Маневски додаде дека на завршната Регионална конференција на нотарите, која се одржа на 3 декември во Сараево, било нагласено дека Македонија е земја-лидер во регионот, која има најмногу достигнувања во областа на нотарството. ( Д.Р.)