Албанските невладини против власта

Советот на албански организации најави за 10 мај дека ќе одржи протест под мотото „За правдина“. И покрај тоа што терминот предвиден за одржување на протестот е на само неколку недели пред клучниот период за носење одлуки околу прашањето за спорот со името, сепак, од Советот велат дека на овој потег се одлучиле поради, како што велат, отежнатата политичка ситуација во Македонија создадена по судските процеси и одлуки, поради државните дискриминаторски политики спрема Албанците во сите сфери, потоа проектот „Скопје 2014“... Од Советот, во кој членуваат околу 40 албански невладини организации, уверуваат дека зад организацијата на овој протест не стои ниту една политичка партија.

Од ДУИ укажуваат дека иако протестите се организираат поради дискриминаторските политики, сепак, сметаат дека терминот пред решавањето на спорот со името не е најдобро избран.

„Бараме итно прекинување на монтираните судски процеси и веднаш да се ослободат осудените од таквите процеси, како што се Сопот, Бродец, хашките случаи. Итно да бидат прекинати политиките на дискриминација врз етничка и религиозна основа во економијата, културата и образованието“, истакна Валон Бела, еден од координаторите на Советот.

Неофицијални извори тврдат дека зад овие протести стои Нова демократија. Од Советот ги отфрлаат ваквите обвиненија.

„Не сме контактирале ниту со нив ниту со друга партија и во голем процент овој протест го организираме и поради деструктивните политики што придонесоа во голем процент за ваквата состојба. Не гледаме како ќе пречиме во преговарачките процеси затоа што протестираме поради владината политика, која е недемократска и нефункционална и само креира лоши меѓуетнички односи“, истакнува Бела.

Од ДУИ реагираат дека, сепак, треба да се има фактот дека рокот за решавање на спорот со името тече и дека засега не е толку важно кога ќе се случи тоа. (Св.У.)