Доцни стартот на изградбата на четирите капитални проекти
Моментно од МВР се чека потврдата за привремените сообраќајни решенија
Сања Наумовска
Почетокот на реализацијата на четирите капитални проекти кои пролетва ги промовираше Градот Скопје ќе доцни еден месец. Иако беше најавено дека проширувањето на „Илинденска“ и на булеварот „Гоце Делчев“ и клучките кај Бит-пазар и Тутунскиот комбинат ќе почнат да се градат во текот на јуни, стартот на нивната реализација се очекува пред крајот на месецов.
Како што информираат градските власти, моментно од Министерството за внатрешни работи се чека потврдата за привремените сообраќајни решенија на овие локации, кои ќе важат за сите учесници во сообраќајот додека траат градежните работи. Веднаш штом ќе бидат готови решенијата, градежните работи ќе започнат на терен, а во Градот очекуваат до крајот на јули да бидат готови сите четири документи.
Во меѓувреме, по завршувањето на тендерите, избрани се и изведувачите. Клучката кај Бит-пазар и проширувањето на „Илинденска“ ќе ги гради „Гранит“, клучката кај Тутунски комбинат „Маврово - Ингра“, а „Конструктор“ проширувањето на булеварот „Гоце Делчев“.
„Се' е подготвено за старт на четирите капитални проекти, се чекаат само привремените сообраќајни решенија, кои се надеваме дека ќе бидат готови за две недели. Сите четири проекти ќе се реализираат паралелно, во текот на летните месеци кога нема многу сообраќај на улиците. За сите се обезбедени пари во буџетот на Градот“, вели Мичо Поповски од Секторот за урбанизам. Тој додава дека на трасата на „Илинденска“ се' уште има нерешени имотноправни проблеми, со кои ќе се справуваат во од, додека трае проширувањето на улицата до крајот н�� годината.
Според планот, „Илинденска“ ќе биде булевар од фонтаната „Лотос“ до раскрсницата кај Воената болница. Изградбата на клучката кај Тутунски комбинат и проширувањето на булеварот „Гоце Делчев“ се во функција на нормално функционирање на клучката „Континентал“ и се очекува сите да завршат кон крајот на летото. Двата проекта ќе го чинат Градот 33 милиони денари. Со клучката кај Бит-пазар, пак, ќе се избегне секое вртење влево и нема да има потреба од семафори, а изградбата ќе чини 40 милиони денари. |
