Уште една јалова седница на Советот на Скопје

Советниците и вчера не успеаја да ги начнат проблемите на граѓаните пред да се испокараат

Последната седница на Советот на Скопје повторно испадна јалова, како продолжение на една лоша традиција што го следи овој советнички состав. Народните избраници на вчерашната седница посветена на советнички прашања, не успеаја ниту да ги начнат проблемите со кои се соочуваат граѓаните, пред да почнат кавга.

Наместо отворање теми за комунални и инфраструктурни проблеми, се закачија на записници од минати седници.

Советниците од СДСМ обвинија дека Советот во нивно отсуство работел и донесувал одлуки без кворум, за што најавија и интерпелација за претседателот на Советот, Ирена Мишева.

Станува збор за две одлуки што се усвоени на седница, која опозицијата ја напушти, а остатокот од советниците експресно ја завршија, усвојувајќи ги сите точки.

Опозиционерите во работата на Советот препознаваат криминал, а тврдењата ги поткрепуваат со тонски записи од спорната седница.

Кавгата не доби епилог, бидејќи беше побарана пауза. За да се докаже уште еднаш баксузната традиција што ги следи седниците за советнички прашања, по завршувањето на паузата Советот не продолжи да работи затоа што, овој пат, во салата немаше струја.

Кога вистинските проблеми на скопјани ќе дојдат на дневен ред и дали советниците ќе имаат желба да дискутираат за нив, допрва ќе видиме. (С.Н.)