Претходен број

Грипот зема залет

Монтирана е термална камера на аеродромот „Александар Велики“

Новиот грип зема залет, а бројот на сомнителни случаи секојдневно расте. Во текот на вчерашниот ден на Инфективната клиника се примени уште два нови сомнителни случаја.

Според информациите од Министерството за здравство, едниот пациент бил на студии во Софија и пред неколку дена пристигнал во земјава, по што почувствувал треска и исцрпеност. По препорака на матичниот лекар, тој се јавил на преглед во Клиниката за инфективни болести, каде што е веднаш хоспитализиран.

Вториот пациент е роден и живее во Австралија. За време на престојот во Македонија, добил симптоми на грип, како што се болка во грлото, сува кашлица и покачена телесна температура, по што е префрлен на Клиниката за инфективни болести.

И вчера Министерството за здравство не излезе со податок од каде се новите случаи. Веројатно повторно со истото објаснување, дека ќе бидат прекршени правата на пациентите, бидејќи сме мала средина, а тие лесно може да бидат препознаени.

Со новите случаи бројот на инфицираните се искачи на 11, од кои двајца веќе се пуштени дома. Моментно, на Клиниката за инфективни болести вкупно се хоспитализирани девет пациенти. Според клиничкиот извештај, здравствената состојба кај сите е стабилна и покажува прогресивно подобрување. За сите сомнителни пациенти во тек се лабораториските анализи за потврда на типот на вирусот.

Термалната камера за детекција на покачена телесна температура на болните на скопскиот аеродром „Александар Велики“ веќе е монтирана. Но, системот се' уште не е ставен во функција. Како што велат во Министерството за здравство, од вчера кадарот се обучува како да работи со апаратот. (Ј.Ј.)