Претходен број

Охрид скап и полупразен

Вистински почеток на годинашнава главна сезона се очекува да биде овој викенд

Симон Илиевски

ОХРИД - Во почетокот на главната туристичка сезона Охрид - најразвиениот туристички центар во Македонија е полупразен. Само половично се исполнети поголемите комерцијални хотелски објекти, а сосема е мала исполнетоста на приватното сместување, особено на апартманите.

Туристичките работници велат дека причина за ваквата посетеност се временските прилики. Но, очигледно е и влијанието на светската економска криза која придонесе за откажување на голем број аранжмани од западноевропските земји.

Процените на туристичките работници се дека со подобрувањето на временските услови ќе се зголеми и посетеноста, а вистинскиот почеток на годинашнава главна туристичка сезона ќе биде овој викенд. Оттаму велат дека околу 15 јули во Охрид ќе се бара кревет повеќе, а дека најбројни ќе бидат домашните гости.

„Во најголемиот хотелски комплекс 'Метропол-Белви' до 10 јули има целосна искористеност на капацитетите зашто се' уште трае конгресниот туризам. Покрај нив имаме гости од Израел, Турција и Србија, а очекуваме и помали групи од Германија и од Холандија. Во текот на главната туристичка сезона, според резервациите, ќе има пополнетост до 50 отсто. Но, бидејќи се работи со отворени резервации, искористеноста може да достигне и до 90 отсто, во зависност дали ќе бидат погодни временските прилики“, објаснува Филип Мишовски од Секторот за продажба.

Според него, полупансионите дневно се движат од 26 до 35 евра за легло во двокреветна соба, цени што се конкурентни во споредба со земјите од соседството.

Засега не се размислува за намалување на цените, освен ако не се реализира барањето на Асоцијацијата на хотелиерите ХОТАМ, за намалување на ДДВ за сместувањето, храната и пијалаците. Според она што го изјави првиот човек на ХОТАМ, Дончо Танески, Владата се' уште молчи и тешко ќе биде да донесе одлука за намалување на даноците, постапка што уште пред неколку месеци ја реализираа некои од соседните земји.

„Не мислиме дека цените на сместувањето и на угостителските услуги се пречка за слабиот старт на сезоната, бидејќи тие се значително пониски од соседните земји. Неколку години едноподруго имаме зголемен број гости од Албанија, Србија и Бугарија“, вели Љупчо Патчев, првиот човек на охридскиот угостителски еснаф.

Цените на угостителските услуги можеби се повисоки од оние во градовите на внатрешноста, но не и од оние во Скопје. Па, затоа странците, како што вели Патчев, често се чудат кога домашните гости реагираат на висината на сметките за дадените угостителски услуги.

„Прекрасно поминуваме во Охрид. Задоволни сме од сместувањето и од цената на ресторанските услуги. Се слушнавме со наши пријатели кои се во Грција. Тие плаќаат помалку за сместување, но неколкупати повеќе за пијалаци или за ручек и вечера“, објаснува млада брачна двојка од Белград.

Слично размислуваат и младите кои доаѓаат од Бугарија и Албанија, а да не зборуваме за оние од западноевропските земји.

Приватното сместување располага со најголем капацитет и радува фактот што постојано се зголемува бројот на приватните станодавци и бројот на апартманите. Според податоците од секторот за туризам и локален економски развој при локалната самоуправа, заклучно со мај се пријавени околу 1.400 приватни станодавци со 3.000 соби кои се категоризирани и достапни преку туристичките агенции. Цените се непроменети и ова лето ќе се движат од 250 до 350 денари за легло во соба со заедничка бања. Апартманите, во зависност од уреденоста, местоположбата и бројот на леглата ќе имаат цени од 20 до 50 евра.