Билјана во фотелјата на Груевски

Граѓаните вчера имаат можност со обиколка на работните простории на Владата да се запознаат директно со начинот на нејзината работа, организациската поставеност и со спроведувањето на владините политики, како дел од манифестацијата „Црвен тепих за граѓаните“, што се одржува трет пат, пренесе агенцијата МИА.

Интерес за манифестацијата покажаа околу 300 граѓани, меѓу кои студенти, пензионери, вработени граѓани, како и ученици. Некои изнесоа и оцени за политиката на Владата, а други дошле со цел да ги пренесат своите сугестии за идното работење на владиниот кабинет. Можност да седне во работниот стол на премиерот Никола Груевски имаше студентката Билјана од Школата по новинарство на МИМ.

„Столот беше многу удобен, како што и се очекува. Во целата просторија се чувствува позитивна енергија и мислам дека сме на вистински пат“, изјави таа порачувајќи дека меѓу граѓаните првенствено треба да се смени меѓусебниот однос и сите да бидат поотворени и пошироки.

Според портпаролот на Владата, Мартин Мартиновски, манифестацијата „Црвен тепих за граѓаните“ е начин на кој во континуитет се покажува концептот на владиниот принцип на отвореност за да можат сите граѓани да се запознаат со начинот на кој функционираат институциите во државата. (П.Р.)