Ивановски оди на Врховен суд

Поранешниот претседател на Уставен суд најави дека кривично ќе го гони Аџиев за клевета

Гордана Дувњак

Експретседателот на Уставен суд, Трендафил Ивановски, смета дека неговиот случај е политички за да се покрие лустрацискиот процес. Тој тврди дека сомневањето му се потврдило по вчерашното добивање на одлуката на Управниот суд, кој ја одби неговата тужба против Комисијата за верификација на фактите, која го прогласи за соработник на тајните служби. Ивановски го оцени како „скандалозно и удар врз правната држава“ тоа што за одлуката дознал еден ден порано преку еден провладин медиум, иако цело време се кажувало дека постапката е строго доверлива и затоа мора одлуката лично да ја подигне од Управниот суд. Но, и покрај тоа што вчераутро тој отишол да го направи тоа, по еден час чекање не ја добил одлуката, а откако најавил брифинг со новинарите експресно му била доставена преку курир.

На ист начин е информиран и претседателот на Комисијата за лустрација, Томе Аџиев. Првиот човек на лустраторите не сакаше да ја коментира пресудата на Управниот суд за тужбата на Ивановски, туку само рече дека се потврдиле нивните наоди. Тој нагласи дека, доколку има жалба до Врховен суд, Комисијата ќе чека што ќе одлучи највисокиот суд, па во зависност од одлуката ќе се постапува натаму.

„Ако лустрацијата се сведе само на мене, колку и да е вистина, тешко дека некој во јавноста ќе го проголта тоа дека во цела Македонија, од 1944 година па до денес, имало само еден соработник на тајните служба“, рече Ивановски на средбата со новинарите. Тој е убеден дека е жртва на тоа што не припаѓа на ниту еден политички табор, што се покажало во другите случаи кога партиите се растрчале да ги спасат своите сопартијци.

Ивановски рече дека не припаѓа ниту на левицата ниту на десницата. „Оттука, за мене немаше пазарења како за другите случаи што ги разгледувала Комисијата“, додаде тој.

Ивановски тврди дека неговото досие, кое го водела УДБА за него, е лично, односно политичко досие, а не соработничко, како што утврди Комисијата за лустрација. Вели дека станува збор за репресирано лице што било прогонувано во средношколските години за младонационалистички идеи. Но, тој е најмногу разочаран од тоа што Управниот суд не отишол ни чекор во утврдувањето на фактичката состојба ниту, пак, се потрудил да ги провери нивните укажувања за нелогичностите, недостатоците и фабрикациите.

Ивановски, единствен за кој досега Комисијата за лустрација потврди дека соработувал со тајните служби, најави дека ќе ја продолжи правната битка пред Врховен суд, кој ќе треба да ја преиспита одлуката на Управниот суд, а ако е неопходно и пред Судот за човекови права во Стразбур. Тој тврди дека не бил соработник, туку жртва на безбедносните служби, оти Комисијата за лустрација погрешно ја утврдила фактичката состојба и дека во досието за него има грешки и фалсификати.

Според Ивановски, Управниот суд не ја завршил работата како што треба и, како што кажа, со тоа се доведува во прашање независноста на судството, па не случајно е таква и оцената на Европската комисија за состојбите во судството во Македонија. Уставниот судија најави и кривична тужба за претседателот на Комисијата за лустрација, затоа што Томе Аџиев тврдел дека имал потпишан документ за соработка со тајните служби што, пак, Ивановски го негираше. Тој побара да се објават сите документи за него, од кои може да се види дека бил соработник, но, како што рече, нема такво нешто, бидејќи 45 години немал никаков контакт со безбедносните служби.