Претходен број

Во владата влегуваат и ДПА и ДУИ?

Груевски ќе има уште една, завршна рунда средби со Али Ахмети и со Мендух Тачи

Светлана Унковска

До понеделник мандатарот Груевски ќе ја донесе и конечната одлука за албанскиот партнер во идната коалициона Влада, а во среда се планира да биде објавен составот и имињата на министрите од новиот владин кабинет, тврдат партиски извори.

По завчерашното продолжување на разговорите со лидерот на ДУИ Али Ахмети, вчера Груевски одржа средби и со првиот човек на ДПА Мендух Тачи. Ваквите информации ги потврди и владиниот портпарол Ивица Боцевски кој најави дека пред конечното обелоденувањето на коалицијата Груевски ќе има уште една, завршна рунда средби со Ахмети, Тачи, како и со лидерот на ПЕИ, Фиат Цаноски. Најверојатно тогаш ќе биде комплетно потпишана и владината програмска платформа, на која според партиски извори недостасува уште парафот на лидерот на ДУИ Ахмети.

Информациите говорат дека се' навестува оти во идниот владин кабинет ќе се најдат двете партии на Албанците, иако и Тачи и Ахмети негираа дека по сето она што се случи на изборите би прифатиле заедничко учество во власта. Изминативе два дена паралелно се одвиваа и консултации на мандатарот и со лидерите на помалите партии од коалицијата предводена од ВМРО-ДПМНЕ, на кои тој ги информирал партнерите за тоа како се одвивале преговорите со двете релевантни партии од албанскиот блок.

Извори од една од партиите коментираат дека со оглед на стабилното мнозинство што го освои, Груевски во разговорите се однесувал "многу комотно". "Сите карти за составување на Владата се во негови раце и затоа во преговорите со албанскиот партнер тој цврсто стои на своите настојувања за принципиелно спро��едување на владината програмска платформата", велат наши извори.

Последниве неколку дена во кабинетот на Груевски е забележана голема раздвиженост на лидерите на помалите коалиционери кои од час во час, како на лента се менуваат на средби со Груевски. По ваквото интензивирање на средбите и разговорите се остава впечаток дека мандатарот во глобала веќе ја има сликата на идниот владин кабинет и дека веќе се при крај и разговорите за целосна распределба на владиниот колач. На овие разговори ги нема поранешни кадри од НСДП, Лазар Еленовски и Живко Јанкуловски, за кои најверојатно ќе нема место во некои од министерствата.

Инаку, во недостиг на официјални детали од средбите на Груевски со Тачи и Ахмети, кои се водат во најголема тајност, со сигурност се тврди дека веќе е извесно дека тој планира во идната Влада да ги земе и ДУИ и ДПА и дека за нив отстапил пет министерски места. Неофицијално се дознава дека со ДПА веќе било договорено соработката да ја продолжат и во овој владин состав, иако Груевски му бил многу лут на Тачи за изборните инциденти.

Од друга страна, пак, преговорите со Ахмети, се уште се водат со праќање на пораки преку медиуми со цел добивање подобри преговарачки позиции, па така од ДУИ кој со освоениот број пратеници го има Бадентеровото мнозинство, потребно за донесување на клучни закони за кои е потребно двотретинско мнозинство, се заканија дека доколку не се договорат со Груевски ќе го блокираат носењето на законите и дека барањето Ахмети да ја потпише програмската платформа на Владата го условуваат со вградување на Мајскиот договор. Од ВМРО-ДПМНЕ веднаш одговорија дека нема да прифатат никакви условувања и дека горната линија за нив е Уставот и Рамковниот договор, како и тоа дека ќе бараат и од двете партии да се изјаснат околу прашањето за името. Затоа, посочуваат изворите, тој сака да ги види и двете партии во идната влада за на некој начин да ја одбегне можноста било која партија со останување надвор од власта да се радикализира и да ги води состојбите кон федерализација. (Св.У.)