Писма до Буш по повод Денот на независноста на САД
„Поддршката и довербата што ја искажаа САД уште поцврсто ја зајакнуваат определбата на Македонија да го заземе заслуженото место во НАТО, а со тоа и да придонесе за регионалната стабилност“. Ова го наведе претседателот Бранко Црвенковски во честитката до американскиот претседател Џорџ Буш, по повод 4 Јули - Денот на независноста на Соединетите Американски Држави.
Изразувајќи голема благодарност за огромната и безрезервна поддршка, Црвенковски во честитката особено ја нагласува лична заложба и придонес на Буш за што поскоро интегрирање на Македонија во НАТО. „Македонија е горда на традиционалното пријателство со американскиот народ и е трајно определена на натамошно зацврстување на ова пријателство и унапредување на соработката во сите сфери од заемен интерес“, се наведува во честитката од Црвенковски до Буш.
Честитка до претседателот Буш упати и премиерот Никола Груевски. (Д.Р.) |
