Градоначалникот на Карпош го остави на улица младинскиот центар „Вавилон“
Со одлука на Димиќ била сменета бравата на просториите кои ги користел центарот
Деспина Трајковска
Двесте членови на Младинскиот едукативен центар „Вавилон“ останаа на улица откако в.д. градоначалникот на Општина Карпош, Саша Димиќ,не им дозволи пристап до работните простории што ги користеа во изминативе седум години. Во вторникот, без никаква најава и предупредување, тврдат од „Вавилон“, градоначалникот испратил извршители кои ја смениле бравата на центарот што се наоѓа во просториите на месната заедница во Карпош 1. Револтирани од гестот на општината, триесетина младинци вчера импровизираа едукативен час пред општинските бараки, користејќи дел од опремата која успеале да ја спасат од затворените простории.
„Општината ни заби нож во грб. Нефер и некоректно не' исфрли од просториите. Целта на нашиот денешен мирен протест е да му покажеме на градоначалникот дека младинскиот активизам го остави на улица и дека стави клуч на врата на центар кој развива неформално образование, едукација и практична работа за млади“, изјави Маја Стојановска, генерален секретар на „Вавилон“, и во името на членовите побара средба со в.д. градоначалникот. Но, поради негова наводна зафатеност, средбата не се одржа.
Младинците за в понеделник најавија идентичен, но помасовен протест, доколку во меѓувреме градоначалникот не ги прими на разговор на кој евентуално би го надминале недоразбирањето.
„Не е точно дека не ги предупредивме за иселувањето. Бесправно е толку години да користат општински имот без никаков надомест. Просториите во кои работеа, како и уште неколку други бесправно дадени на здруженија на граѓани, ќе се огласат за издавање, бидејќи тоа е имот на општината и за нивно користење треба да се плати кирија“, ни изјави вчера градоначалникот Димиќ, кој обвини дека овој случај е само еден од приватните проекти на некогашниот градоначалник на Карпош, Стевче Јакимовски.
Прозваниот Јакимовски, пак, ги отфрла обвинувањата на негова сметка, посочувајќи дека просториите на центарот му биле отстапени во времето кога со општината раководел Андреј Петров.
Од МЕЦ „Вавилон“ објаснија дека прос��ориите ги добиле од Општина Карпош како дел од проектот на Светска банка и Агенцијата за спорт и млади за имплементација на Националната стратегија за млади. Било договорено општината да отстапи простор за користење на центарот, кој ќе има обврска единствено да ги плаќа комуналиите.
|
