Започна изградбата на вториот крак на клучката-детелинка „Бит-пазар“
Третата и четвртата позиција ќе се градат по целосно завршување на првите две
Екипите на градежното претпријатие „Гранит“ започнаа со работа и на втората позиција на клучката-детелинка „Бит-пазар“, кај полициската станица. Веќе еден месец се работи и на првиот крак, кај поликлиниката „Бит- пазар“. Деновиве, на двете локации се привршува со премостувањето на подземните инсталации, а се работи и на ископување и тампонирање на теренот. Следната фаза ќе биде асфалтирањето, доколку дозволат временските услови.
„Во трка сме со времето, бидејќи ако наскоро падне првиот снег и ако не успееме да асфалтираме до затворањето на асфалтните бази, ќе мора да чекаме подобри услови“, вели Коста Зекмановски, надзор на изградбата. Тој надополнува дека третата и четвртата позиција од детелинката ќе се градат по целосното завршување на првите две. „Пред да преминеме на спротивната страна на улицата, мора да создадеме услови за измена на режимот на сообраќај поради тоа што првите два крака мора да бидат асфалтирани“, вели Зекмановски.
Со изградба на клучката целосно ќе се реконструира натпатникот кај Бит- пазар, по кој во иднина сообраќајот ќе се одвива според системот вртење само вдесно. Семафорите ќе бидат извадени, бидејќи ќе нема потреба од вртење влево и вкрстување на сообраќај во спротивни правци, со што практично, ќе се сведе на минимум сообраќајниот хаос што постои сега на овој потег. За изградба на клучката кај Бит- пазар, Градот Скопје одвои 40 милиони денари. (С.Н.)
|
